Эресейни халкъларыны бирлигини джылына, аны кибик Къарачай-Черкесияны миллетлерини тин эмда маданият байлыкъларыны джылына аталыб, арттотур (апрель) айны 10-дан 11-не дери «История, культура и традиции народов КЧР» деген оюн-этноквиз бардырылгъанды.

Анга республиканы 13 баш эмда орта билим берген окъуу заведениесини студентлери къошулгъандыла.
Этноквизни Миллет ишлени хакъындан федерал агентство бла «Архыз 24» медиахолдингни болушлукълары бла КъЧР-ни Миллет ишлерини, кёбчюлюк коммуникациялары бла басмасыны хакъындан министерствосу къурагъанды.
«КъЧР-ни миллет ишлерини, кёбчюлюк коммуникациялары бла басмасыны хакъындан министри Мурат Есенеевни атындан барыгъызгъа да хошкелди айтыргъа излейме. Бюгюн былайда кёб тири, фахмулу джаш адам барды. Ол джаш тёлю республикабызны тарихин, маданиятын сансыз этмегенине шагъатлыкъды. Къарачай-Черкесияда кёб тюрлю миллетни келечиси бир-бирлери бла шохлукъда, бирикмекликде джашайды, ол а, сёзсюз да, бизни кючюбюздю. Барынга да джетишимле теджейме», – деди КъЧР-ни Миллет ишлерини, кёбчюлюк коммуникациялары бла басмасыны хакъындан министерстовосуну къуллукъчусу Эдиланы Таулан.
Оюнну кёзюуюнде джаш адамла тарих, маданият, миллет политика бла байламлы соруулагъа джууабла бергендиле, республиканы миллетлерини адетлерин къалай билгенлерин кёргюзгендиле. Эм сейири уа программада Къарачай-Черкесияны субъект къурагъан беш миллетини ушхууурлары теджелген эдиле. Алай бла, студентле миллет хантла къалай этилгенлери бла шагъырей болгъандыла.
«Оюнну тамалында кёб сейир иш теджелгенди. Быллай оюнлагъа бек сюйюб къошулабыз, алада билимибизни ёсдюребиз. «История, культура и традиции народов КЧР» деген оюнда, къуру кесибизни миллетибизни болмай, башхаланы адетлери, маданиятлары, тарихлери бла да танышыр мадар табханбыз», – дегенди этноквизге къошулгъанланы бири, «Синергия» университетни студенти Дарья Сиротина.
Этноквизни эсеблерине кёре, 1-чи орунну «Кавказский ренессанс» команда (Къарачай-Черкес кърал университетни студентлери), 2-чи орунну «Синергия традиций» команда («Синергия» университетни студентлери), 3-чю орунну «Наследие Кавказа» команда («Синергия» университетни студентлери) алгъандыла.
Алчы орунланы алгъанлагъа кубокла бла саугъала, оюннга къошулгъанлагъа да хурмет грамотала берилгендиле.
Жюрини келечилери, командаланы билимлерине уллу багъа бере, быллай ишле джаш тёлюге республиканы миллетлерини маданиятларын иги билирге болушханларын, миллетле арасы джарашыулукъну бегитгенлерин чертгендиле.
«Былайда хар не да оюн халда таб къуралгъанды, бола тургъан затлагъа сюйюб къарадым. Командаланы къурамында болгъанланы бары да тириликлерин танытхандыла. Мен оюм этгенден, бу оюн уллу хайыр келтиреди. Барыбызгъа да бир республикада джашаргъа буюрулгъанды. Бизни кючюбюз недеди? Ана тиллени, маданиятланы кёблюгюнде, шохлукъда джашагъаныбызда. Аны себебли, хоншу миллетлени адетлерин, маданиятларын билирге керекди», – дегенди жюрини председатели, «Адыгэ Хасэ» джамагъат бирлешликни тамадасы Али Асланов.

САЛПАГЪАРЛАНЫ Умар.