Мындан алда «Архыз 24» телеканалны залында адамла эсебде болмагъан сауутларын, кеслери разылыкълары бла къралгъа къалай берирге боллукъларын ангылатыугъа аталгъан джыйылыу къуралгъан эди.

Алайгъа келген экспертлени арасында Эресей гвардияны КъЧР-де управлениесини Сауут-сабаны джюрютюуню контролда тутхан, лицензион-эркинлик берген бёлюмюню тамадасы полицияны майору Валерий Шаков, КъЧР-ни МВД-ны джергили инспекторланы ишлерин къурагъан эксперт бёлюмню тамадасы полицияны майору Залим Тлисов, КъЧР-ни Миллет ишлерини, кёбчюлюк коммуникацияла бла басманы хакъындан министерствосуну къуллукъчусу Аджиланы Руслан бар эдиле.
Ала, ючюсю да, кёзюу-кёзюу, бу ишни юсюнден терен хапар айтдыла, сорулгъан соруулагъа джууабла бердиле. Биринчи Валерий Шаков сёлешди.
«Эресей гвардия бла МВД биригиб, сауут-сабаны, атылыргъа боллукъ затланы законсуз джюрютюуге къаршчы профилактика ишле бардыргъанлай турабыз. Аллайы болгъан кеси разылыгъы бла къралгъа берирча мадарла этебиз. Озгъан 2025-чи джыл адамла сыйдам быргъысы болгъан алты сауут келтиргендиле. Алагъа аны ючюн, 18 минг ачха чыгъарылгъанды. РФ-ны Терслеу кодексинде белгиленнгеннге кёре, саууту-сабасы, атылтыучу затлары болгъан адам аланы кеси келтириб берсе, ол джууаблылыкъгъа тартылмайды. Алай этерге кёлленнген адам КъЧР-ни МВД-ны джергили органларыны къайсы бирине да барыргъа боллукъду. Ол иш кишиге айтылмайды, ташатын къалады.
Законсуз тутулгъан сауутну къралгъа ётдюрген адам, анга ачха алыр ючюн, кеси разылыгъы бла бергенине справкасы болургъа керекди. Аны МВД-ны джергили органы береди. Кеслери разылыкълары бла ич ишлени органларына сауут ётдюрген адамлагъа, ала ючюн ачха саугъаны Къарачай-Черкес Республиканы Промышленность бла энергетиканы хакъындан министерствосу тёлейди. Ачха адамны банк счётуна ийиледи», – деди ол.
Аны ызындан Залим Тлисов бла Аджиланы Руслан сёлешдиле.
«Сёз ючюн, адам законсуз асыраб тургъан сауут-сабасын элтиб ич ишлени органларына берирге эркинлиги барды. Ол иш хайырлыды эмда аны терен магъанасы барды. Алай этген адам, сауутну эркинликсиз асыраб тургъаны ючюн, не джаны бла да джууаблылыкъгъа тартылмайды. Кеси да, адамлары да къоркъуулу болумгъа тюшмейдиле.
Адам, аллай иш этер ючюн, полицияны джергили бёлюмюне барыб, сауут берирге излегенин айтады. Алайда полицияны къуллукъчулары анга не этерге кереклисин юретиб, болушлукъ табдырлыкъдыла. Адам сауутну кеси элтгенден эсе, ол къоркъуулу болургъа боллукъду, полицияны къуллукъчулары барыб алсала игиди. Ала, керекли актны джазыб, хар затны законнга кёре, тыйыншлысыча этерикдиле. Аллай адамны юсюнден кишиге хапар айтылмайды. Къоркъургъа керек тюлдю, бизни баш муратыбыз сизге, эркинликсиз асыралгъан сауутдан къутулургъа болушууду, къоркъуусузлугъугъузну сакълауду.
Сауут-сабаны эркинликсиз асыраб тургъан ол уллу аманлыкъгъа саналады. Аллай адам закон бла къаты джууаблылыкъгъа тартылады.
Биз Къарачай-Черкесияда эсебге тюшюрюлмеген сауутну-сабаны, атылгъан затланы, эркинликсиз асыраб тургъан адамланы бу ашхы мадарны хайырландырыргъа чакъырабыз. Алай этсегиз, кесигизни, джууукъларыгъызны да сакълаб, республикада законну, джорукъну бегитирге энчи юлюш къошарыкъсыз», – дедиле ала.

Лепшокъланы Хусеин.