Арттотур (апрель) айны 7-де, Саулукъ сакълауну бютеудуния кюнюнде, Къарачай-Черкесияны шахарларында, районларында спорт, саулукъ сакълау ишле бардырылгъандыла.

Черкесск шахарда Хорламны паркында белгили спортчу, джаш адамланы арасында самбодан Эресейни биринчилиги ючюн эришиуледе джез медалгъа ие болгъан Рахман Напиджев эртденнги зарядка бардыргъанды. Анга республикан аралыкъны школларыны сохталары къошулгъандыла. Спортчу джаш эм алгъа сабийлени санларын чыныкъдырыргъа эмда саулукъларын бегитирге джарарыкъ упражнениелени кёргюзгенди, ызы бла самбону лагъымларына юретгенди.
Черкесскени коррекцион школунда да, Саулукъ сакълауну кюню бла Космонавтиканы кюнюне атаб, «Космический марафон» деб уллу байрам бардырылгъанды. Школну директору Ирина Борисова хошкелди сёз айтханындан сора, сабийле «Саулукъ» деген ракетада «космосха учаргъа» хазырланыб тебрегендиле. Аны аллы бла джиу-джитсудан дунияны юч кере чемпиону, шахарда 6-чы номерли спорт школну эркин тутушдан тренери Айбазланы Расул сабийлеге зарядка этдиргенди. Ызы бла гитче классланы сохталары тюрлю-тюрлю эстафеталагъа къошулуб эришгендиле. Абадан классланы сохталары уа космос бла байламлы стол оюнлада усталыкъларын, къарыуларын сынагъандыла.
Черкесск шахарны 15-чи номерли лицейинде да Саулукъ сакълауну кюню белгиленнгенди. Сабийлеге къонакъгъа дзюдодан спортну халкъла арасы класслы устасы, самбодан спортну устасы, Европаны биринчилигинде кюмюш медалгъа ие болгъан, Эресейни кубогуну чемпиону Альберт Огузов келиб, зарядка этдиргенди. Ол сабийлеге мастер-класс кёргюзгенди, спорт бла кюрешиуню магъанасыны юсюнден айтханды, окъууда джетишимле теджегенди.
Саулукъ сакълауну кюнюне аталгъан ишле Къарачай-Черкесияны шахарлары бла районларыны барында да ётгендиле.

САЛПАГЪАРЛАНЫ Умар.