Эресейни Миллет гвардиясыны Санкт-Петербургда Жуковну орденин джюрютген Аскер академиясында, джорукъ сакълаучу органланы къуллукъчуларын спортну талай тюрлюсюне юретиб тургъан белгили тренер Михаил Николаевич Шубниковгъа аталыб, дзюдодан эришиуле бардырылгъандыла.

Академияда окъугъан джаш адамла, ауурлукъларына кёре къауумлагъа юлешиниб, ол эришиуледе къарыуларын, болумларын сынагъандыла.
Спортчула дзюдону амалларын къалахайырландыргъанларына Эресейни дзюдодан чемпиону Даниил Сергеевич Пережогин бла Михаил Николаевич Шубниковну эт-джен адамлары багъа бергендиле. Ала, кишиге джан аурутмай, керти да болумлу спортчуланы саугъалагъандыла.
Саугъаланнганланы арасында бизни джердешибиз, Миллет гвардияны Аскер академиясыны курсанты Айбазланы Рамазанны джашы Амиран да барды. Амиран кесини ауурлугъунда биринчи орунну алгъанды.
Къарачай-Черкесиядан джаш адам окъуугъа кирген джылында огъуна аллай сыйлы ВУЗ-да джетишимли болгъанына барыбыз да бек къууаннганбыз.
Бизни джуртубузну атын махтау бла айтдыргъан улан бла ёхтемленнгенибизни билдире, аллына таукел баргъан Амираннга мындан ары да уллу джетишимле теджейбиз.

СОЛТАНЛАНЫ Зульфия.