Къарачай-Черкес кърал университетни студентлери бла устазлары Къарачай шахарны джамагъатын бирикдирген донор акция къурагъандыла.

Бу баш окъуу заведениени ректоруну борчларын толтургъан Ёзденланы Умар айтхандан, акцияны тамалында джыйылгъан къан Эресей Федерацияны Къоруулау министерствосуну госпиталларына ийилликди.
«Къарачай-Черкес кърал университетни студентлери быллай сууаблыкъ акциялагъа къошулуб тургъанлы 15 джыл чакълы бир болады. Ала граждан, социал джууаблылыкъларын сюйюб танытадыла. Бизни студентле бла устазла бу ашхы ишге терен эс ийиб, аны магъанасын толу ангылаб, къан керек болуб инджилгенлеге таукеллик танытыб болушадыла. Мындан ары да алай этер муратлыдыла», – дейди ол.
Медицина къуллукъчула, керекли затла бла толу баджарылгъан джер-джерге кёчюрюлюучю лабораторияны университетни джеринде къуруб, санитар излемлени тамалында ишлерин тыйыншлы дараджада толтурадыла. Студентле, устазла да сууаб ишни этгенлерине къууанадыла, бирикмекликни, шохлукъну, къайгъырыуну кючюн джаядыла.
Бу сууаб иш Шимал Кавказ федерал илму клиника аралыкъны джер-джерге барыб ишлеучю бригадасыны болушлугъу бла бардырылады.

(БИЗНИ КОРР.).