Арттотур (апрель) айны 7-де имам Абу Ханифаны атын джюрютген Къарачай-Черкес ислам институтда «Механизмы формирования ценностных ориентиров в религиозной сфере» деген темагъа аталыб «тёгерек стол» болгъанды.
Аны къураугъа, бардырыугъа болушханла Ислам маданиятха, илмугъа эмда окъуугъа джакълыкъ этген фонд бла КъЧР-ни Муслиманларыны дин управлениеси эдиле. «Тёгерек столда» ушакъгъа дин къуллукъчула, имамла, дин окъуу заведениелени устазлары бла студентлеринден сора да кърал, джамагъат къуллукъчула, СМИ-ни келечилери да чакъырылгъан эди.
Джамагъатны, бютюн да бек джаш къауумну, арасында юретиу-ангылатыу иш къачан да керек болгъанлай тургъанды. Бусагъатда уа аны магъанасы айырылыб уллуду. Къралыбызны тыш, ич джаулары башларын кёлтюрюб тебреген къыйын заманда джаш адамлагъа къоркъуу къайсы джанындан келлигин эсгертирге керек болады. «Дин политикагъа къатышмазгъа керекди» дегенча патауала къураб кюрешген адамлагъа кеслерин терилтмез ючюн, джаш къауумну тыйыншлы билимлери, джюрекде ийманлары, адеблери-намыслары, ишленмекликлери болургъа тыйыншлыды. Хар не дженгил тюрлениучю заманда юретиу-ангылатыу ишде да анга кёре джангы мадарла, лагъымла изленедиле. Ай медет, терс атлагъанланы сокъмагъына тюшерге хазыр тургъан джаш адамланы марлайдыла къралыбызны, динибизни да джаулары.
Тамам бу затланы юсюнден тынгылы ушакъ этдиле «тёгерек столну» джанында олтургъан адамла. Джаш адамлагъа тюз билимни, тюз ангыны, тюз халини сингдириуде дин къуллукъчуларыбызны, айхай да, уллу къыйынлары барды. Ол джаны бла бизни республикада ислам институтда иш тохтаусуз баргъанлай турады. Бюгюнлюкде, шукур Аллахха, тыш къраллагъа бармагъанлай, кесибизде дин джаны бла баш билим алыргъа мадар барды. Аны юсюне да медресе ишлейди, хар межгитде дегенча Къур’аннга юретген курсла джашчыкъланы, къызчыкъланы чакъыргъанлай турадыла. Къуру Ючкекендеги республикан медресе арт джыллада ненча сохтаны хафизле этиб чыгъаргъанды. Аны выпускниклери, былтыр, быйыл да ораза айда тарауих (трапы) намазда кюн сайын бир джюзню окъуб, Къур’анны толусу бла чыкъгъандыла. Межгитледе бусагъатда джума намазны тышында да кёб ауаз айтылгъаны да ашхы ишди.
Алайды да, динни юсю бла ата-бабаладан келген, тин хазнаны сакълауну, къралда, халкъда джюрюген, халкъ бирден багъалатхан ариу адетлени, джорукъланы кёбчюлюкню ичинде джайыуну юсюнден сёлешдиле «тегерек столда». Джамагъат-политика джашаугъа муслиманла къачан да тири къошулгъандыла. Анга шагъатлыкъла келтириб сёлешдиле бу джыйылыугъа чакъырылгъанла. Ушакъны темаларыны бири РФ-ны Президенти Владимир Путинни 2022-чи джыл абыстол (ноябрь) айны 9-да чыкъгъан «Об утверждении Основ государственной политики по сохранению и укреплению традиционных российских духовно-нравственных ценностей» деген Указы бла байламлы эди.
Кърал Башчыны 2026-чы джылны – «Эресейни халкъларыны бирлигини джылы» деб атагъанын, СВО-ну джакълагъанларын, анда аскерчилерибизге джан аурутханларын, аланы юйдегилерине болушлукъ этгенлерин билдирген эдиле бу мероприятиеге келгенлени къайсы бири да. Аны бла бирге ала терроризмни идеологиясын ислам дин кери ургъанын да кёргюзген эдиле. Юретиу-ангылатыу ишде соцсетлени тюз хайырландырыуну юсюнден да талай оюм, таб, сау докладла огъуна айтылгъан эди джыйылыуда.
Эм аллында КъЧР-ни муфтийи Эриккенланы Мухаммад хаджи, хошкелди сёз айтыб, «башында сагъынылгъан затланы юсюнден хар ким, уялмай, кёлюгюздегин айтыгъыз» деб, чакъырыу этген эди. Алайда КъЧР-ни маданиятыны министри Агирбов Зураб, КъЧР-ни окъуу эмда илму министрини орунбасары Атайланы Лейла, КъЧР-ни Миллет ишлерини, кёбчюлюк коммуникацияла бла басманы хакъындан министерствосунда джамагъат-политика процесслени анализи эмда мониторинги бла кюрешген бёлюмню тамадасы Карасов Асхад, ол министерствону СМИ-ле бла байламлылыкъ джюрютюуге, китаб басмалаугъа джууаблы ишлеге къарагъан бёлюмюню тамадасы Аджиланы Руслан, имам Абу Ханифаны атын джюрютген Шимал Кавказ ислам университетни ректору Шебзухов Мурат, республикан медресени директору Айбазланы Расул, Имам Абу Ханифаны атын джюрютген КъЧР-де ислам институтну окъуу джаны бла проректору, тарих илмуланы кандидаты Чомаланы Заур эмда башхала сёлешгендиле.
Ахырында башында сагъынылгъан ишлени джашауда бардырыуну юсюнден резолюция алыннганды.
Ёзденланы Якъуб.
