Джёгетей Аягъы шахарны «Джашил айрымканы» къонакъланы сакълайды. Аны талай заманны джарашдырыб тургъандыла. Аны джангыртыу бла байламлы проект, IX-чу бютеу Эресей конкурсха къошулуб, «Гитче шахарла бла тарих магъаналы джерле» деген категорияда хорламлы болгъанды.

– «Джашил айрымканны» проекти табигъатны ариулугъу бла, миллетни адетлери бла къысха байламлыды. Быллай солуу джерле республиканы джер-джеринде ишлене тургъанлары да ол затха толу шагъатлыкъды. Былайын джарашдыргъан заманда деменгили, табигъат бла байламлы къурулуш материалланы хайырландыргъандыла, – деб чертгендиле Эресей Федерацияны Къурулуш министерствосунда.
Паркны джарашдыргъан заманда бютюн да аслам эсни кёлге бёлгендиле: тёгерегин кереклисича бегитгендиле, дренаж салгъандыла, адамла джюрюген джолчукъланы ариу этгендиле. Кёлню тёгерегинде уа болмагъан зат джокъду: спорт майданчыкъла, сабийле ойнаргъа джараулу джерле, адамла джюрюрча эмда солурча зонала.
Маданият мероприятиелени бардырыргъа багъышланнган джерле да джетишедиле. Эм игиси уа, адамла бери джылны къайсы бир чагъында да сюйюб келликдиле. Эм бек сейирсиндирген, къууандыргъан – былайда хар кёзге илиннген затны Къарачай-Черкесияда джашагъан миллетлени джашаулары, адетлери, тарихлери бла байламлы болгъаныды.