Къобан районну Счастливое элинде врач-амбулатория пунктну къурулушу тамамланнганды. Ол, эшиклерин кенг ачыб, адамлагъа хошкелди айтады. Аны юсюнден Къарачай-Черкес Республиканы Башчысы Темрезланы Рашид кесини МАХ-да каналында билдиргенди.

– Юйлеринден узакъ бармагъанлай Счастливое элде джашагъанла джангы ишленнген саулукъ сакълау учреждениеде тыйыншлы медицина болушлукъ табарыкъдыла. Анда заманны излеминден артха къалмагъан амбулатория эшиклерин ачханды. Ол «Аякъ юсюнде узакъ ёмюр» миллет проектни эмда «Бирикген Эресей» партияны Халкъ программасыны тамалында ишленнгенди. Кёб турмай аны ичине джангы оборудование салынныкъды. Анда адамлагъа кёб тюрлю медицина болушлукъ этерча мадар къураллыкъды. Адамла кеслерине къаратыр иннетде узакълагъа барыб айланныкъ тюлдюле. Саулукъ сакълауну ал звеносун игилендириу бу санагъатны дараджасын кёлтюрюудю, – деб джазгъанды Темрез улу.
Кёб турмай джангы врач амбулаторияны мекямы Джагъада да хазыр боллукъду. Джангы Джёгетейде тамамлы ремонт этилген медицина пункт да къысха заманда эшиклерин ачарыкъды. Джылны аягъына дери энтда 11 объектни къурулушу тамамланныкъды.
Аны кибик Адыге-Хаблде ара район поликлиниканы, Къарачай шахарда терапия корпусну ишлеб башларыкъдыла.