Арттотур (апрель) айны 7-де Черкесск шахарны Джарыкълыкъ къаласында «Бирикген Эресей» партияны регионал бёлюмю «Есть результат!» деген форумну бардырды. Ол партияны Халкъ программасы республикада беш джылны ичинде къалай толтурулгъаныны эсеблерин чыгъарыугъа аталгъан эди.

Форумгъа республиканы кърал власть органларыны къуллукъчулары, Парламентни депутатлары, джамагъат бирлешликлени келечилери, аскер къаугъаны ветеранлары, джаш тёлю къошулгъан эди.
Форумну тамалында тёрт «тёгерек стол» къуралгъан эди – «От социальных гарантий к качеству жизни: поддержка участников специальной военной операции и их семей в Карачаево-Черкесии», «Экономическое развитие региона: итоги и новые горизонты», «Развитие сельских территорий Карачаево-Черкесии. Перспективы», «Социальная сфера Карачаево-Черкесии: от выполнения национальных целей к новому качеству жизни».

Алагъа къошулгъанла партияны Халкъ программасын толтурууну юсюнден сёлешгендиле эмда партияны джангы программасына теджерча проектле хазырлагъандыла.
Ызы бла пленар кенгеш бардырылды. Аны кёзюуюнде КъЧР-ни Халкъ Джыйылыууну (Парламентини) Председатели, «Бирикген Эресей» партияны регионал бёлюмюню секретары Александр Иванов республиканы Башчысы Темрезланы Рашидни атындан джыйылгъанлагъа хошкелди айтды, этилген ишлени эсеблерин да чыгъарды.
– «Бирикген Эресей» партияны Халкъ программасыны тамалында республикада кёб ашхы иш этилгенди. Аланы арасында СВО-гъа къошулгъанлагъа, аланы юйдегилерине болушлукъ этиу баш ишлени бириди. Партия, аскерчилеге, аланы юйдегилерине къайгъырыуну бойнуна алыб, тыйыншлы законла джарашдырыб, иги кесек социал болушлукъ мадар къурагъанды. Аны бла бирге беш джылны ичинде регионда 30 саулукъ сакълау, 74 билим бериу, 31 маданият, 60 спорт учреждение ишленнгенди, ремонт ишле бардырылгъандыла. 295-ден аслам кёбчюлюк хайырланыучу джер бла кёб фатарлы юйлени арбазлары джарашдырылгъандыла, 348 километр джолгъа ремонт этилгенди, школлагъа эмда саулукъ сакълау учреждениелеге 190 улоу берилгенди. Сабийлери болгъан юйдегилеге болушлукъ этиу да партияны баш ишлерини бириди. Айтыргъа, ючюнчю сабий тууса берилген ачханы ёлчеми ёсгенди, очно халда окъугъан сылтаулу студентлеге пособие къуралгъанды, тёртюнчю сабийге берилген регионал Ана капиталны ёлчемине да къошулгъанды, сегиз эмда андан да кёб сабийли юйдегилеге мекямларын игилендирирге регионал дараджада 1-шер мелиуан сом бериледи. Саулукъ сакълау санагъатха да тыйыншлы эс бёлюнеди – республиканы больницалары «Терк болушлукъ» машинала, джангы оборудование бла баджарыладыла. Газификация да магъаналы ишлени бириди. Беш джылны ичинде газ бла баджаргъан 6 объект ишленнгенди, «Социальная догазификация» программаны тамалында 6 675 кесамат этилгенди. Аны бла бирге бир къауум льготалы адамгъа арбазларында газ бла байламлы ишлени бардырыугъа регионал бюджетден ачха болушлукъ этиледи, газ оборудование сатыб алыргъа да субсидия бериледи. Алай бла, беш джылны ичинде партия Халкъ программасын джетишимли толтургъанды, – деди Александр Иванов.
Андан сора «тёгерек столланы» модераторлары сёлешдиле. Ала партияны Халкъ программасына къошаргъа боллукъ талай проектни теджедиле. Сёз ючюн, аскер къаугъаны ветераны, Ётгюрлюкню ордени бла юч кере саугъаланнган Рустам Магомедов СВО-ну бютеу ветеранларын да федерал бюджетни ачхасына джашар мекямла бла баджарыргъа, коммунал джумушла ючюн компенсация этерге, аскерчиле спорт бла кюреширча аланы деменгили протезле бла баджарыргъа кереклисини юсюнден айтды.
Андан сора да халкъ программагъа къошаргъа табышлылыкъ ишни, туризмни айнытыуну, эллени газ, суу бла баджарыуну хакъындан ишле, «Земский» программаны тамалында ишлеген устазлагъа, врачлагъа, фельдшерлеге, тренерлеге, маданият къуллукъчулагъа берилген ачханы джыл сайын инфляциягъа кёре индексация этиб турургъа, «Земский учитель» программагъа орта усталыкъ берген учреждениелени устазлары да къошулурча этерге, джылы ушхууурла бла абадан класслада окъугъанланы да баджарыргъа, регионланы ара шахарларында кёб фукциялы маданият-спорт аралыкъла ачаргъа, «Пушкинская картаны» юлгюсю бла джаш тёлю спорт ишлеге къошулурча «Спорт карта» къураргъа дегенча магъаналы оюмла теджелдиле.

БИЧЕНЧИЛАНЫ Умар.