Къарачай-Черкес Республика туризм инфраструктураларын тири джарашдыргъан эресейчи регионланы бириди.

Росстат 2026-чы джылны башил-байрым (январь-февраль) айларына чыгъаргъан эсеблеге кёре, ол джаны бла ёсюм 119 процентге джетгенди.
Бу хапарны РФ-ны Вице-премьери Дмитрий Чернышенко бла экономика ёсюмюню хакъындан министри Максим Решетников баямлагъандыла.
Аны юсюнден КъЧР-ни Башчысы Темрезланы Рашид МАХ мессенджерде: «Арт 2 джылны ичинде бизни республикада туризм инфраструктураны игилендириуге иги эс бёлюнеди. Этилген ишлени себеблеринден къонакълагъа теджелирге джараулу орунла 30 процентге кёб болгъандыла. Аны бла да къалмай, «Аманаууз» деген къонакъ юйню ишлеуге аталгъанча, уллу инвестицион проектле толтуруладыла. Ала да къонакълагъа асламыракъ орун къураргъа себеблик этерикдиле.
Къонакъла келирча этгенден сора да, алагъа сау джылны узуну таб болумда зауукълу солурча мадарла къураргъа кюрешебиз. Алай этилгени республиканы экономика болумун игилендирирге да, бизнесге ёсюм алдырыргъа да, джангы иш орунла ачаргъа да джарайды. Бу ишибизни мындан ары да бардырлыкъбыз. Къарачай-Черкесияны туризм бла байламлы ёсюм алыр хыйсабы уллуду», – деб джазгъанды.