Арттотур (апрель) айны 8-де РФ-ны Вице-премьери Марат Хуснуллин Эресейни Къурулуш бла ЖКХ-ны хакъындан министерствосуну къуллукъчулары эмда Кърал советни келечилери бла бирге «Инфраструктура для жизни» деген миллет проектни толтурууну юсюнден кенгеш бардыргъанды.
Ол кенгешге видеоконференция халда Къарачай-Черкесияны Башчысы Темрезланы Рашид да къошулгъанды.
Кенгешге къошулгъаныны хапарын Темрез улу МАХ мессенджерде кесини официал каналында джазгъанды.
Башчы билдиргенден, кенгешге къошулгъан кърал къуллукъчула «Инфраструктура для жизни» деген миллет проектни тамалында ЖКХ-ны джангыртыу, цифра технологияланы хайырландырыу, кёбчюлюк барыучу джерлени таб джарашдырыу дегенча ишлени тыйыншлысыча этиб, адамланы джашауларын игилендириуню, къоркъуусузлукъларын бегитиуню юсюнден сёлешгендиле.
Кенгешде джангы юйле ишлеб, хайырланыугъа бериуге, эллеге ёсюм алдырыугъа, джангы регионланы айнытыугъа айырыб эс бёлюннгенди.
Марат Хуснуллин Эресейни Президенти Владимир Путин къралны Правительствосуна да, регионлагъа да ол джаны бла этиллик ишлени 2030-чу джылгъа дери тыйыншлысыча баджарыргъа борч салгъанын чертгенди. Хар иш да белгиленнгенича таб баджарыла барса, 2036-чы джылгъа дери да ол халда тирилик танытыргъа кереклисин айтханды.
Былтыр толтурулуб башланнган «Инфраструктура для жизни» деген миллет проект ол нюзюр бла къуралгъанды. Аны тамалында къысха заманнга бек кёб иш этилгенди.
Темрезланы Рашид ол джаны бла белгиленнген ишле бизни республикада да тыйыншлы баджарыла баргъанларын чертгенди.
Къарачай-Черкесияда джангы юйле ишлеуге аталгъан проектле джетишимли толтуруладыла, коммунал инфраструктура джангыртылады, кёбчюлюк барыучу джерле таб джарашдырыладыла.
«Инфраструктура для жизни» деген миллет проектни тамалында Дружба, Псыж, Преградное эл къуралышланы суу бла баджарлыкъ объектле ишленедиле, къоркъуулу юйледе джашагъанла кёчюрюледиле, джолла джарашдырыладыла.
Аны тышында да, Тебердиде сууну тазалагъан сооружение ишлетир, Къарачай шахарны кърал дараджалы конкурсда хорламлы болгъан проектини тамалында паркын дагъыда кёбчюлюкге джораланнган 18 джерни таб джарашдырыр мурат барды.
