Бу кюнледе Къарачай-Черкесияны Правительствосуну Председатели Мурат Аргунов машиналаны иелерини граждан джууаблылыкъларын амалсыз страхование этиуню (ОСАГО) хакъындан кенгеш бардыргъанды.

Ол кенгешге Миллет банкны КъЧР-де бёлюмюню тамадасы Дмитрий Мещеряков, КъЧР-ни улоу бла джол мюлкню хакъындан министри Семенланы Ренат, КъЧР-ни МВД-ны Тинтиу управлениесини улоуну хайырландырыугъа къарагъан бёлюмюню тамадасы Людмила Маликова, страхование бла кюрешген компанияланы келечилери къошулгъандыла.
Ала 2025-чи джылны эсеблерине кёре КъЧР-де ОСАГО джарашдырыу бла байламлы ишлени сюзгендиле.
Мурат Аргунов, ол эсеблени юлгюге келтире, 2025-чи джыл Къарачай-Черкесияда ОСАГО джарашдырыу тири бардырылгъанын чертгенди.
Джыйылгъанла «Об обязательном страховании гражданской ответственности владельцев транспортных средств» деген 40-чы номерли федерал законнга кийирилген тюрлениулени да сюзгендиле.
Тюрлениуле полислери болгъан водителлени чарпыугъа тюшген машиналарын ишлетирге асламыракъ ачха тёлетир, хыйлачылагъа къаршчы кюрешни бардырыр, хар водителни да полиси болгъаны бла къалгъанын ачыкълар мадарла этиу бла байламлыдыла.
Кенгешни ахырында ОСАГО рынокну игилендирирге, полислени багъаларын хурджунлары джукъаракъла да джарашдырырча этерге, республиканы джолларында болумгъа аслам эс бёлюрге кереклиси чертилгенди.