Черкесск шахарда джашагъан 22 джыл болгъан тиширыу, хыйлачылагъа кесин алдатыб, 270 минг сомундан къуру къалгъанды.

Ол тиширыугъа биреулен Новосибирск областда эсебге тюшген телефон номерден къонгурау къагъыб: «Мен налог къуллукъну ишчисиме. Сизни борчугъуз болгъанын билдирирге излейме. Сиз, къагъытларыгъызны да алыб, налог къуллукъгъа барыргъа керексиз. Приемгъа джазылыр ючюн, СНИЛС-ни номерин айтыгъыз», – дегенди. Тиширыу хыйлачы айтханча этгенди.
Ызы бла аны телефонуна быллай билдириу келгенди: «Сизни «Госуслуги» порталда энчи кабинетигизге Украинадан ким эсе да киргенди. Ол иш сиз билмегенлей этилген эсе, бу номерге къонгурау къагъыгъыз». Тиширыу биягъынлай, хыйлачылагъа ийнаныб, аланы айтханларын этгенди. Аны бла «Госуслуги» порталны «къуллукъчусу» сёлешиб: «Аманлыкъчыла, террорист бирлешликлеге болушлукъ этер ючюн, сизни энчи данныйлеригизни хайырландырадыла. Алагъа тыйгъыч салыр ючюн 270 минг сомну биз айтхан счётха ашырыргъа керексиз», – дегенди. Тиширыу энтда, хыйлачыланы айтханларын этиб, ачха ашыргъанды.
Эресейни МВД-ны Черкесск шахарда бёлюмю, бу хыйлачыланы ачыкълар ючюн, терслеу иш ачыб, оператив-тинтиу ишле бардырады.
Багъалы джамагъат! ФНС, башха кърал органланы къуллукъчулары джумушларын телефон бла баджармайдыла, тыш къраллы мессенджерле бла хайырланмайдыла, кодланы да сормайдыла. Сизге ким болса да, къонгурау къагъыб, кодну айтдыртыргъа излесе, сиз берген соруулагъа кескин джууаб бермесе неда ашыкъдырыб кюрешсе, ол хыйлачы болгъанын эсге алыгъыз. Ол заманда телефонну салыб къоюгъуз. Информациягъа официал источникледе къарагъыз, алада джазылгъан телефон номерле бла хайырланыгъыз.

КъЧР-ни МВД-ны пресс-къуллугъу.