Арттотур (апрель) айны 5-де Черкесскеде, адетдеча, быйыл да джазгъы эл мюлк джармалыкъ бардырылды. Анга Къарачай-Черкесиядан, Ставрополь, Краснодар крайладан, Адыгеядан 140 эл мюлкчю къошулгъан эди. Ала чыгъаргъан затларын адамлагъа учуз багъасы бла теджей эдиле.

Ол иш багъа болмагъан, агъачлы продукция бла адамланы баджарыр муратда Къарачай-Черкес Республиканы Башчысы Темрезланы Рашидни аманаты бла къуралгъан эди. Алайда Черкесскени джамагъатындан сора да, шахарладан, элледен келген кёб адам бар эди.
«Быйыл джазгъы джармалыкъ, башха джылладан эсе, бир кесек эртдерек бардырылады. Бюгюн былайда эл мюлк продукция чыгъарыучу 140 мюлк барды. Мен, адамлагъа таблыкъ излей, быллай хайырлы ишни къураргъа болушханлары ючюн, КъЧР-ни Промышленность бла энергетика министерствосуна, Черкесскени мэриясына, джангур джаугъанына да къарамай, кеслерини продукцияларын келтириб, адамлагъа теджеген фермерлеге разылыгъымы билдиреме», – деген эди. КъЧР-ни эл мюлк министрини орунбасары Джамбулат Лехов.
Джармалыкъда сютден, этден этилген кёб тюрлю иги зат бар эди. Тенгизни продукталары, тахта, терек кёгетле, татлы затла, шай, бал, шекер, орнатыргъа джораланнган терекчикле, башха ашарыкъ затла джамагъатны эсин кеслерине бура эдиле. Адамла, хар затха къууаныб къарай, керекли затларын табыб, сюйюб ала эдиле. Былайда сатылгъан затланы багъалары базардан 15-20 процентге учуз эди.
Джармалыкъны заманында республиканы Кърал филармониясыны артистлери, концерт кёргюзте, аламат джырлай, тепсей эдиле.
Тюрлю-тюрлю миллетлени адамлары бир-бири бла ушакъ эте, арада шохлукъну кючю бегий, болум иги эди.

Лепшокъланы Хусеин.