Алтотур (март) айны 31-ден арттотур (апрель) айны 4-не дери Рязань шахарда, «Кубок Командующего ВДВ» деб, Эресейни Джигити генерал-полковник Владимир Шамановну ёчюне аталыб, джыллары 19-дан 40-гъа дери болгъан эркишилени арасында боксдан эришиуле ётгендиле.

Эришиулеге къралыбызны 29 регионундан бютеулей 135 боксёр къошулгъанды. Аланы арасында бизни республикадан да талай спортчу болгъанды. Джердешлерибиз кеслерини ауурлукъларына кёре, талай къауумгъа бёлюнюб, къарыуларын сынагъандыла. Джумдурукъ тюйюшге Боташланы Алий кесини 60 килограмм ауурлугъунда, тёрт кере къошулуб, юч кере хорлагъанды. Алай бла, ол, экинчи оруннга чыгъыб, кюмюш медаль бла саугъаланнганды. Аны боксну не тюрлю лагъымлары бла да толу хайырлана билирге, кече-кюн демей юретиучю устазы Боташланы Зауурду.
Бу тукъум магъаналы эришиуледе хорламлы болгъан уллу джетишимди. Анга барыбыз да къууаннганыбызны билдире, мындан ары да Боташ улугъа спортда
уллу джетишимле теджейбиз.

(БИЗНИ КОРР.).