Февралны 12-де КъЧР-ни Сайлау комиссиясы сайлау бюллетенлени санаучу комплекслени презентациясын этди.Презентациягъа чакъырылгъанланы араларында политика партияланы регионал бёлюмлерини эмда кёбчюлюк информацияны мадарларыны келечилери, КъЧР-ни Сайлау комиссиясыны членлери, аны аппаратында ишлеген къуллукъчула бар эдиле.
Джыйылыуну башлай, Ресизбиркомну тамадасы Абазалыланы Лариса Къарачай-Черкесияда бу джангы модель биринчи кере хайырландырыллыгъын чертди. «КОИБ-2017» деб комплексни аты алайды, «комплекс обработки избирательных бюллетеней» деб ангылашынады. Аны хайырландырыуну юсюнден доклад этиб, аппаратланы кеслерин ишлетиб да кёргюздю Сайлау комиссияны информацион аралыгъыны башчысы Къагъыйланы Фатима. Ол айтыудан, бу джангы моделни алгъаракъда чыкъгъан «КОИБ-2010» дегенден талай башхалыгъы барды: бояулу уллу сенсор экраны, таб джарашхан клавиатурасы, аны кибик бирси затлары. Ол кеси да Интернет бла байламлы тюлдю, Wi-Fi бла ишлемейди, керекли информация анга флешкадан тюл, иш этиб чыгъарылгъан, QR-кодлары болгъан къагъытладан кёчюрюледи. Дагъыда бир игиси: ток джукъланыб къалса да, аппарат сау сагъатны кесича ишлеб туралады.
Алайда «КОИБ-2017» комплексни сынаб да кёрдюле. Ол комплекследен, Сайлау комиссияны тамадасы Абазалыланы Лариса айтханнга кёре, бизни республикагъа 44-сюн келтиргендиле да, районлада, шахарлада сайлау участоклагъа салгъандыла.
{jcomments}
