Халкъы ючюн къарыуун, кючюн къатлагъан, адебни, намысны тутуб, сууаблыкъгъа къанат кериб джашагъан онглу уланланы бириди Джуртубайланы Сюлеменни джашы Ибрагим. Таза иннетли, таукел, тири, джигер адам, чомартлыгъын, чемерлигин таныта, алгъа учунады.

Атасы Сюлемен Первомайское элде эл мюлк училищени бошагъанды. Ол, атасына болуша, «Сторожевой» совхозда аны бла бирге къой, тууар къошда малда ишлегенди. Атасындан келген чемерлигини кючюн тёгерекге джая, адамлагъа къууанч келтириб тургъанды. Агъачдан чолпула, къалакъла, турмушда бек керекли башха затла этиб, адамлагъа алайлай бергенди. Анга бусагъатда да кёбле бюсюреу этгенлей турадыла.
Анасы Къаракетланы Апайны къызы Асият 4 джашны ариу халили этиб ёсдюрюрге джашауун атаб, аланы халкъны ашхы адетлерини, адебни, намысны тамалында юретиб кюрешгенди. Аны тышында, юйде болгъан маллагъа, бачхагъа, юй джумушлагъа къараб, ишге, чалкъыгъа баргъанлагъа азыкъ джарашдырыб, башха джумушланы баджара, джигитлигин, джигерлигин танытханды.
Ибрагим 1977-чи джыл байрым (февраль) айны 18-де Сторожевойда Сюлеменни адебни, намысны багъалатхан, халкъны ашхы адетлерин сыйлагъан огъурлу юйдегисинде туугъанды. Мында орта школну бошагъандан сора, Къарачай-Черкес кърал университетге кириб, аны тарих факультетин тауусуб, «тарихчи» деген усталыкъ алыб чыкъгъанды. Ол джыл огъуна аскерге барыб, ол сыйлы, джууаблы борчун махтау бла толтуруб къайтханды. Урунуу джолун МВД-ны Къарачай шахарда бёлюмюнде башлайды. Анда къралны законуну тамалында ППС-ни ротасыны командири болуб къуллукъ этгенди. Ол къуллукъну толтургъанла джаяу аскерчиледиле, эшикде ишлейдиле. Ала, джамагъатны къоркъуусузлугъун сакълай, мамырлыкъ, рахатлыкъ орун алыб турур ючюн, кече-кюн демей, кюрешгендиле. Терс сёлешгенни, табсыз джюрюгенни, эсириб аман ишле этгенни, башха законну, джорукъну излемин бузгъанланы айыбларына джолукъдургъанлай тургъанды. Ибрагимни таб башчылыкъ этиую бла ол къуллукъда ишлегенле, джигерлик, джигитлик танытыб, алагъа салыннган джууаблы борчну сый бла толтургъандыла. Ол бу къуллугъуна 20 джыл джашауун бергенди. Андан сора, бу ишини юсю бла Москва шахаргъа барыб, юч джылны ишлеб къайтханды. Ибрагим анда темир джоллагъа джууаблы болгъанды. Андан келиб, ишин андан ары бардыра, адамладан бюсюреу табыб пенсиягъа чыкъгъынчы ишлегенди.
Таулу джаш, тыйыншлы солууда болуб да, юйде бош олтуруб туралмай, къарт атасындан, атасындан келген усталыкъ бла, сабийлигинден кёрюб тургъан заты бла, кюрешиб башлайды. Фахмусу, чемерлиги болгъан таулу джаш агъач къалай джонулгъанын, хазыр болгъан агъачдан не затла этерге боллугъуну юсюнден сагъыш этеди. Алай бла, агъачдан тюз, сахан табакъла, къалакъла этиб башлайды. Аланы джаратыб тилегенлеге бериб барады, адамланы излеген затларын да этиб тургъанды. Фахмулу джаш халкъыбыз турмушда хайырландыргъан, тарих магъанасы болгъан затланы – сахан табакъланы, алгъыш аякъланы, чёмючлени, къалакъла, тюз къазан чолпуланы дагъыда башха затланы – аламат этиб, беш джылны кюрешеди. Миллетибизни аллай ашхы хазнасы унутулуб къалмасын деб, хар этген затына тюз иннетини, халал джюрегини ашхы кючюн сала, тутхан ишине толу берилиб, кече-кюн демей, ишлеб турады.
Сёз ючюн, къозу терекден алгъыш аякъла, джёгеден, юргеден, джеркден сахан табакъла этеди. Адамла аны чыгъармаларын асламысына саугъагъа деб аладыла. Алгъыш аякъгъа тукъум тамгъа салыб да береди.
Ибрагим Темирболатланы Асланны къызы Дахира бла джашауун бир этеди. Алагъа беш сабий тууады. Амина Черкесскеде медицина институтну тишлеге къарагъан врачла хазырлагъан факультетинде окъуйду. Умар Ставрополь аграр институтну программистле хазырлагъан факультетини студентиди. Мусса да ол баш окъуу заведениедеди. Имран Къарачай шахарны 5-чи номерли школуну 3-чю классына джюрюйдю. Сафина да бу школда 2-чи классха барады.
Ибрагим, тарих магъанасы болгъан, адамлагъа къууанч келтирген иши бла кюреше, хар этген затына огъур кючюн, сюймеклигин сингдире, фахмуну тёрюнден къарай, ашхы чыгъармачылыгъыны кючюн бегите, таукел алгъа барады.

Лепшокъланы Хусеин.