Хар бир адам да джюреги къыйналса, къууанса неда ачыкъ кёлден адамгъа сукъланса, сезимлерин башхалагъа да билдирирге излейди.
Джашау тюрлене баргъаныча, адамланы халилери да тюрленедиле. Тау миллетлени ашхы шартлары унутула, тас бола баргъанларына, адебге, намысха, сыйгъа да бурунча тыйыншлы багъа берилмегенине барыбыз да шагъатлыкъ этерчабыз. Алай болса да, иги, ариу халили, намысларына бек адамларыбыз да кёбдюле. Аланы кёрсенг, джюрегинги къууанч кючлеб, аны ким да танысын, билсин деб, хапарын айтырынг келеди.
Ма аллай адамланы бириди Къарачай шахарда СССР-ни Джигити Багъатырланы Харунну атын джюрютген 3-чю номерли орта школну директору Чотчаланы Муссаны къызы Аминат.
Чырайы, халиси, адамлыгъы, этимлилиги бир-бирине келишген, кесин устазлагъа, сохталагъа да бирча сюйдюре билген, тутхан ишин тамамлы баджаргъан адамды ол. Аны джашау джолу кимге да юлгюдю.
Чотчаланы Муссаны къызы Аминат 1973-чю джыл арттотур (апрель) айда туугъанды. Къарачай шахарда 4-чю номерли орта школда джетишимли окъугъанды. 1995-чи джыл Къарачай-Черкес кърал университетни тарих бёлюмюн тауусханды. Андан сора Къарачай шахарда 3-чю номерли школда тарихден устаз болуб ишлей тургъанлай, 6-чы номерли школда тарихден окъутхан устазлары ишден кетгени амалтын, Аминатны аны орнуна ишге чакъырадыла.
Усталыгъына толу берилген таулу тиширыуну болуму башчылыкъ этерге джетеригин кёрюб, аны 2012-чи джыл байрым (февраль) айда 6-чы номерли школгъа директор къуллукъгъа салгъан эдиле. Ол джууаблы къуллукъну бет джарыкълы толтура, Чотчаланы Аминат анда 7 джылны ишлегенди. 2019-чу джылны байрым (февраль) айында уа, ал кёзюуде ишлеген джерине, 3-чю номерли орта школгъа директор болуб къайтханды. «Ишин сюйген – сюйюмлю» дегенлей, сыфаты ариуча, ишин да кереклисича тындыра, бусагъатда ол устазладан, сохталадан бюсюреу таба ишлейди.
Аминат Муссаевна ана тилибизни сакълаугъа айырыб аслам эс бёледи. Тил бла адабиятдан окъутхан устазланы джыйыб, дерслерибизни сейир къураргъа, сохталаны ана тилибизге кёллендирирге джарарыкъ тюрлю-тюрлю лагъымла, мадарла теджегенлей, аланы хайырландырыуну юсюнде бизни бла оноулашханлай турады. Аны башчылыгъы бла ишибиз аллына барады.
Арттотур (апрель) айны 9-да бизни тамадабызны туугъан кюнюдю, ол байрам бла алгъышлай, Муссаны къызы Аминатха сюек саулукъ, джюрек тынчлыкъ, узакъ ёмюр теджейбиз! Быллай адамларыбызны саны кёб болса, тилибиз, миллетибиз да айнырыкъ эди деб, мурат этеме.
Алийланы Лариса,
устаз.
