Эресейни Президенти В.В.Путин законну юрист болушлукъну алайына этерге боллукъ статьясында адамланы тизимин кенгертген тюрлениулени бегитгенди.
Аны юсюнден Право информацияны интернет-порталында официал халда басмаланнганды. Былайда сёз 2026-чы джыл алтотур (март) айны 23-де чыкъгъан 64-чю номерли федерал законну «О бесплатной юридической помощи в Российской Федерации» деген 20-чы статьясында этилген тюрлениулени юсюнден барады.
Анда айтылгъаннга кёре, энди ачха джоюм этмегенлей, юрист джаны бла алайына болушлукъ, бу къауум адамгъа тыйыншлыды:
джерлеринден къачхынчы болуб ышыкъ излеген неда кёчмеселе башха амаллары болмай келген адамла (джарсыулары ачыкъланнгандан сора);
аны тышында да, Эресей Федерацияны джеринде къысха заманны ичинде турургъа болджаллы келген къауумгъа да юрист болушлукъ керек болса (къачхынчы статусну джарашдырыр ючюн неда болджал бла къысха заманнга ышыкъ табар къайгъыда керекли къагъытланы этген кёзюуде).
Эсигизге салыргъа излейбиз, андан сора да, 2011-чи джыл абыстол (ноябрь) айны 21-де чыкъгъан 324-чю федерал законну 20-чы статьясына кёре, башында сагъынылгъан болушлукъ бла хайырланыргъа эркинликлери болгъан бу къауумну тизимин:
юйдегиге тюшген хайыр, субъектде белгиленнгенине кёре, джашау кечинмекни эм тёбен дараджасына джетмеген неда джангыз джашагъан гражданла;
I-чи, II-чи къауумлу сакъатла;
Уллу Ата джурт къазауатны ветеранлары, Эресей Федерацияны, Совет Союзну Джигитлери, аны кибик Социалист Урунууну Джигитлери;
РФ-ны Сауутлу кючлеринде неда Эресей гвардияда аскер къуллукъ эте тургъанла;
кеслери разылыкълары бла кесамат этиб неда аскер къуллукъгъа чакъырылыб, СВО-гъа къошулгъан гражданла;
юч неда андан аслам сабийи болгъан атала бла анала, сабийлерине 18 джылы толмагъан неда окъуу учреждениеде окъуй тургъан сабийине 23 джылы толгъунчу заманны ичинде;
сакъат неда ёксюз къалгъан, ата-ана джылыудан айырылгъан сабийле;
къоркъуулу кёзюуледе джарсыгъан гражданла.
Дагъыда мигрантла, санлары эркин къымылдамагъан кемизли адамла, иш хакълары тыйыншлы тёленмей джарсыгъан ишчиле да кеслерини эркинликлерин джакълар нюзюрде башында сагъынылгъан мадарла бла
хайырланыргъа боллукъдула.
Башында сагъынылгъан болушлукъ бла адамланы тыйыншлысыча толу баджарыр ючюн, аны бла байламлы ишлеген системагъа ауурлукъ бек тиймезча, механизм джаны бла энтда джангы мадарла да къураллыкъдыла.
БАТЧАЛАНЫ Фатима.
