КъЧР-ни Окъуу бла илму министерствосу билдиргеннге кёре, байрым (февраль) айны 2-не ЕГЭ, ОГЭ берликле къагъытларын джарашдырыб бошагъандыла.

ЕГЭ берлик джаш тёлюню саны 1940 болгъанды: 1694-сю – школну быйыл бошагъанла; 126-сы – ал джыллада школну тауусхан къауум; 108-и – орта билим бла бирге усталыкъ берген окъуу заведениелени бошагъанла; 12-си – онунчу классда окъугъан сабийле.
Республикада тогъузунчу классланы 5600 окъуучусу къошуллукъду ОГЭ берирге.
Экзаменлени бет джарыкълы берир ючюн, республиканы мектеблеринде хазырланыу ишле кёб бардырадыла: тюрлю-тюрлю интернет ресурсла бла ишлеу, демоверсияланы тинтиу, «ФИПИ-школе» деб басмаланнган кёб вариантлы ЕГЭ, ОГЭ болушлукъчу китаблада дерслени баджарыу, билген билимлерин къайтарыу… Сора алгъан билимлерин сынаргъа ЕГЭ, ОГЭ ишлени (КИМ) джазыб кёрюу.
Эресейни Билим бериу министерствосу да, джыл сайын этиучюсюча, быйыл да экзамен сынауланы джаздырыб кёргенди. Кърал экзамен керти къаллай болумда бериллик эсе, аллай хыйсабда ётдюле ол сынам экзаменле да. 11-чи классла алтотур (март) айны 4-де орус тил бла математиканы бирден бердиле, кимге къайсы тюшгенине кёре. 9-чу классла алтотур (март) айны 17-де математиканы джаздыла, арттотур (апрель) айны 14-де орус тилни берликдиле. «Пробный» деб айтылсала да ол экзаменлеге, керти экзаменледеча, тамам кюрешгендиле джумушну къурагъан, бардыргъан да Эресейни Билим бериу министерствосуну эмда КъЧР-ни Окъуу бла илму министерствосуну бу экзаменлеге къошулгъан тыйыншлы адамлары. Башында айтылыннган ишле барысы да кърал экзаменледе джунчумай билген билимлерин таукел кёргюзюрге сабийлеге себеб болур деб этилгендиле. Джорукъгъа юретир ючюн къуралгъан экзаменлени эсеблери бла, «халатла бла ишлеу» деб, сабийле да, устазлары да джетишмеген джерлерин, джунчутхан темаларын къайтарыб, къалгъан заманларын игирек хайырландырырча онглукъ боллукъду.

Ижаланы Фатима.