КъЧР-ни МВД-ны Экстремизмге къаршчы кюреш бардыргъан аралыгъыны, РФ-ны Ич ишлерини министерствосуну Экстремизмге къаршчы кюреш бардыргъан баш управлениесини, Эресейни ФСБ-ны КъЧР-де управлениесини къуллукъчулары бла Эресей гвардияны аскерчилери бирге Черкесск шахарда джашагъан биреуленни тутхандыла. Ол терроризм бла байламлы ишлеге къошулгъанды деб терсленеди.

Ачыкъланнганнга кёре, республикан аралыкъда джашагъан 30 джыл болгъан биреулен, атасыны телефонун алыб, белгили интернет-ресурсланы биринде аккаунт къурагъанды. Аккаунт бла хайырланыб, ол Эресейге къаршчы комментарийле, аудио материалла салыб тургъанды. Алада джамагъатны бир-бирине ёчюкдюрген, адамланы неда къауумланы сыйларын тюшюрген затла болгъандыла. Ол эркиши аланы юслери бла РФ-ны къраллыгъын бузаргъа, миллет адетлени эмда динни тамалында Евразияда джангы кърал къураргъа кереклисини юсюнден оюмун сингдириб кюрешгенди. Эркиши аманлыкъ ишлени этгенине лингвистика тинтиуле шагъатлыкъ этедиле. Тинтиу ишлени кёзюуюнде ол адам терслигин бойнуна алгъанды.
Аны бла бирге ол эркиши Эресейде тыйгъыч салыннган террорист бирлешликлени келечилери этген ишлеге разы болгъанын билдириб, интернетде комментарийле джазгъанды.
Полицияны къуллукъчулары джыйгъан материаллагъа кёре, Эресейни Тинтиу комитетини КъЧР-де управлениеси ол эркишиге РФ-ны Терслеу кодексини 205.2-чи статьясыны 2-чи бёлюмюне (публичные призывы к осуществлению террористической деятельности, публичное оправдание или пропаганда терроризма) эмда 282-чи статьясыны 2-чи бёлюмюню «а» кесегине кёре (возбуждение ненависти либо вражды, а равно унижение человеческого достоинства) терслеу ишле ачханды.
Терсленнген адамгъа джашагъан джеринден джукъгъа кетмезге, кесин законну тамалында джюрютюрге деб бегим чыгъарылгъанды.