Мындан алда Къарачай-Черкес Республикада аталаны, аналаны, экспертлени, джамагъат къуллукъчуланы бирикдирген окъуу-билим джайгъан акцияны ахыр эсеблерин чыгъаргъандыла.

Аны «Знание» деген джамагъат-кърал организация къурагъанды. Ол иш, 1600 адам къошулуб, эки ыйыкъны ичинде республиканы шахарларында, районларында бардырылгъанды.
Аны кёзюуюнде сабийни аман затдан, терсейгенден къалай тыяргъа кереклисини, интернетни къоркъуусуз къалай этерге боллугъуну хакъындан айтхандыла. Атала-анала эмда «Знаниени» лекторлары ачыкъ ушакъла этгендиле.
Къарачай-Черкесияны Муслиманларыны дин управлениесини джаш тёлюге къарагъан комитетини тамадасы, ара межгитни имамы Семенланы Динислам хаджи тин, иннет байлыкъны, адебни, намысны, ата-бабадан келген ашхы адетлени юслеринден аламат доклад, этгенди.
«Биз, бурундан келген ашхы затланы юслеринден айта, ата-бабаларыбыз тутуб тургъан, хайырландыргъан адетлени, адебни, намысны, адамны тюзюне бургъан башха игиликлени эсгеребиз. Аланы арасында адам кесинден уллуну сыйларгъа, кесинден гитчеге къайгъырыргъа, Джуртха сюймеклик, кертилик танытыргъа кереклиси, аны кибик башха кёб иги зат барды. Ала бары да юйдегиде тёлюден тёлюге кёче баргъан ашхы шартладыла. Биз аталагъа, аналагъа аланы сакъларгъа, тутаргъа юретирге, эсгертирге борчлубуз. Ол байламлылыкъ юзюлмейин тёлюден тёлюге кёчюб барыргъа керекди», – дейди Семенланы Динислам хаджи.
Аны ызындан Къарачай-Черкес Республиканы Халкъ Джыйылыууну (Парламентини) депутаты, «Архыз 24» медиахолдингни тамадасы Батчаланы Мадина джаш адамла, интернетде керексиз затлагъа алданыб терсине кетмей, тюзюне къалай барыргъа боллукъларыны хакъындан сёлешди.
«Сабий бюгюнлюкде окъуб башлагъынчы огъуна къолуна смартфонну алады. Биз, оюн бошалыб, аман зат къалайдан башланнганын алагъа айтыб ангылатыргъа керекбиз. Аны юсюнде ата бла ана кёб тюрлю затны хайырландырыб, сабийлери тюзюне барырча хал къураргъа борчлудула. Ала бюгюнлюкде тюз хайырландырылмагъан технологиядан къоркъуу болгъанын ангыларгъа керекдиле. Кеслери билиб, сабийлерине да айтыб турургъа керекдиле», – дегенди ол.
МВД-ны Экстремизмге къаршчы кюрешни бардыргъан аралыгъыны къуллукъчусу полицияны майору Ирина Пхешкова сабийлени терсине буруб, кеслерине ишлетирге излегенле, алагъа соцсетлени юсю бла къалай чыкъгъанларыны юсюнден юлгюле келтириб хапар айтханды.
Форумну иши Черкесскени 19-чу номерли гимназиясында башланыб, Джёгетей Аягъы районну Маданият аралыгъында да, 5-чи, 6-чы номерли школлада да, башха тыйыншлы джерледе да бардырылгъанды. Аны тамалында бардырылгъан ишлеге бек кёб ата-ана къошулгъанды. Эркишиле, тиширыула да, алайлада ушакълагъа тири къошулуб, соруула бериб, этген оюмларын айтыб, тюбешиуле иги халда ётгендиле.
«Знание» деген эресейчи джамагъат бирлешликни Къарачай-Черкесияда филиалыны тамадасы Болатланы Артур, форумну ахыр эсеблерини юслеринден, аны магъаналыгъыны хакъындан айта, бу форумгъа кёб юйдеги къошулгъанын, атала бла анала кёб джангы затдан хапарлы болгъанларын чертгенди. Аланы баш ишлери, адамла не тюрлю болумда да, эслерин тас этмейин, тюзюне атларча мадарла къурау болгъанын билдиргенди.

Алчакъланы Хусей.