Къарачай-Черкесияны окъуу-билим берген учреждениелеринде къоркъуусузлукъгъа уллу эс бёлюнеди. Кёб болмай Преградна стансени 1-чи номерли школунда отдан сакъланыу бла байламлы юрениуле бардырылгъандыла.

Мероприятиени бардыргъанланы баш муратлары адамланы эмда сохталаны къыйын болумда джунчумазгъа юретиудю.
Къуугъун келгенлей, сохтала, устазла да, бир-бирлерине тынгылаб, школдан чыгъадыла, белгиленнген джерде джыйылыб, бир-бирлерин джокълайдыла.
Айтыугъа кёре, кийимле тагъылгъан джер джаныб тебрейди. Планнга кёре, отдан джарсыгъан адамны тышына чыгъарыргъа, анга тыйыншлы болушлукъ табдырыргъа керек болгъанды. Бу джумушха Преградна стансени 12-чи отдан къутхарыу бёлеги да къошулгъанды.
Алайды да, «джана тургъан джерден» къутхарыучула адамланы чыгъарыб, тирилик танытхандыла. Юрениулени аягъында баджарылгъан ишге багъа бергендиле.
– Быллай юрениуле тыйыншлы бёлеклени, учреждениелени да хазырлыкъларын кёргюзедиле. Кертиси бла да тюшгени болса, кимни не этерге кереклисин ангылатадыла, – дегендиле стансени отдан къутхарыу бёлегинде.
Быллай юрениуле регионну школларында кёзюу-кёзюую бла бардырылгъанлай турадыла. Ёсюб келген тёлюле кеслерин сакъларгъа эмда болушлукъ этерге юренедиле.