«МТС» ПАО билдиргеннге кёре, мобиль связь болмагъан узакъ джерледе орналгъан эллеге пилотсуз учуучу аппаратла бла телекоммуникацион джумушланы табдырыугъа багъышланнган проектлени джарашдырыу башланнганды.

Эресейни операторларыны ичлеринде МТС, биринчи болуб, Саратов областны Вольск шахарында LТЕ станция къурулгъан аэростатны сынаб кёргенди.
Журналистле да къараб тургъанлай, аэростат 300 метр мийикликге кёлтюрюлгенди, аны тюб джанында тагъылгъан антеннасы болгъан радиомодуль 10 километр джерни радио связь бла толу баджаргъанды. Станциягъа джерден «буйрукъ» берилгенди эмда ол, оптика кабелни кючюне таяныб, радиомодуль бла джалгъашханды.
– МТС технология джаны бла алчыды. Телерадиокоммуникацияланы игилендириу бла кюрешеди. Ол бюгюннге дери джарашдырылгъан инфраструктурагъа джангыланы да таукел къошады. Хауада пилотсуз джюрюген системала бла байламлы программаланы сынаугъа эс бёлебиз. Аланы хайырландырыб, уллу джоюм да этмегенлей, узакъ эмда адамла аз джашагъан джерледе радио связны къураргъа излейбиз. Бара-баргъан заманда ала бла орбита спутникле да хайырланыргъа боллукъдула, – дегенди МТС-ни баш директору Инесса Васильевна Галактионова.