Бютеу къралгъа белгили Доммай курортда «Аманаууз» деб къыш, джай да ишлерик къонакъ юйню къурулушу къызыу барады. Бу республикада уллу инвестицион объектлени бириди. Аны юсюнден Къарачай-Черкес Республиканы Башчысы Темрезланы Рашид кесини соцсетлеринде билдиргенди.

Бюгюнлюкде объектни фундаментини тамалын хазыр этгендиле, уллу темир бетон конструкцияланы джарашдыра турадыла. Иш пландан чыкъмагъанлай барады. Къонакъ юй заманны излемине келишген мекям болур ючюн, къурулушчула къадалыб кюрешедиле.
Регионну Башчысы айтханнга кёре, бу проектни джашаугъа сингдириу республиканы экономика болумун айнытыуда уллу атламды. Ол туристлени сюйген джерлери боллукъду. Кёб адам аны юсю бла иш табарыкъды.
– «Аманаууз» кесине тау джерлени сюйгенлени тартырыкъды. Туристле Эресейни джер-джеринден Доммайгъа джол тутарыкъларына да ийнанама. Доммайны бу къонакъ юй иги джанына тюрлендирликди, заманны излемине келишген объект бла барыбыз да ёхтемленирге боллукъбуз, – деб джазгъанды Темрез улу.