«Кавказ» Р-217 джолну республиканы ара шахарына кирген джеринде джолну ремонту 60 процентге тамамланнганды. Сёз Садовое элден чыкъгъан джерден келе Черкесскеде Ставропольская бла Набережная бир-бирлерине къошулгъан орамланы хакъындан барады.

– Джолну сегиз километри тёрт сызгъылы болгъанды. Джолчула суу ётерча джети быргъы да, узунлугъу 150 метр болгъан таянчакълыкъ этерча къабыргъала да ишлегендиле. Псыжда юч километр джолну лампаларын ауушдургъандыла, джолну эки джанына джангы буруу салгъандыла. Адамла къоркъуусуз ётерча 2,6 километр джаяу джолчукъ да ишлегендиле. Энди былайда джол белгиле салыб тебрерикдиле, – деб билдиргендиле «Кавказ» джол управлениени пресс-къуллугъунда.
Бу проектни джашауда орунлу этиуню магъанасы уллуду. Былайы бла республиканы кёб джеринден ара шахаргъа келедиле. Белгили курортларыбызгъа да туристле бу джол бла барадыла. 2026-чы джылны абыстол (ноябрь) айына джол толусу бла хазыр боллукъду. Джол хайырланыугъа теджелсе, алайы бла джюрюген улоуну саны ёсерикди, джол къоркъуусуз, тынгылы да боллукъду, кеси да кенгерликди. Иш бусагъатдача барса, белгиленнген болджалгъа тамамланныкъды.