«Россети Шимал Кавказ» компанияны Къарачай-Черкес бёлюмю эки айны ичине электрокъууатны16,91 процентге аяулу этгенди. Алай бла, башил-байрым (январь-февраль) айлада планда белгиленнгенинден эсе 0,46 процентге аз кюйдюрюлгенди эмда былтырны бу заманындан эсе электрокъууат 0,43 процентге аз къоратылгъанды.

Эсеблени хакъындан сёлешиннген санагъат кенгешде бёлюмню директору Гочияланы Марат билдиргенди аны юсюнден. Отчёт кёзюуню ичинде белгиленнген борчну бет джарыкълы толтургъандыла. Электрокъууатны 1,2 мелиуан киловатт-сагъаты аяулу болгъанды. Ол электрокъууат бютеу Уруп районнга ай джарымгъа джетерикди. Анда уа 25 мингнге джууукъ адам джашайды, социал магъаналы объектлени саны да 35 чакълы бирди.
Эм иги кёргюзюмлеге Гитче Къарачай районну энергетиклери ие болгъандыла – ала электрокъууатны пландан тышында 7,2 процентге аяулу этгендиле.
Ишни бу дараджагъа чыгъарыр ючюн, энергетикле, айланыб, ток бла джашыртын хайырланнганланы ачыкълайдыла, эски приборланы, оборудованиени джангылагъа ауушдурадыла, юретиу-ангылатыу ишни бардыргъанлай турадыла.