«Абхазия — инвестиции в будущее» деген экономика форумну кёзюуюнде КъЧР-ни Башчысы Темрезланы Рашид, Абхазияны Президенти Бадра Гунба бла энчи тюбешиб, арада иш джюрютюуню юсюнден ушакъ этгенди.

Темрезланы Рашид Абхазияны халы мындан алгъа баргъан кёзюуюнден эсе бу джол игиге айланнганын, анда адамла къууанчлы болгъанларын чертгенди.
Тюбешиуню юсюнден Темрез улу социал сетледе: «Бу джол биргеме сабийни да элтген эдим. Марат Абхазиягъа барыргъа, аны маданияты бла шагъырей болургъа излеб тура эди. Бадра Зурабович, алай этгеними ушатханын билдире, тамблагъы байламлылыгъыбызны сабийле бегитириклерин чертиб сёлешди», – деб джазгъанды.
Республиканы Башчысы чертгенден, тюбешиуде экономика, промышленность, туризм дегенча санагъатлада иш джюрютюуню юсюнден сёлешиннгенди.
«Мындан ары да арада байламлылыкъны бегите, республикаларыбызны айнытыргъа джараулу башламчылыкъларыбызны джашауда толтура барлыкъбыз. Тарихибизни бирлиги, бирбирибизге сый бере, билек бола билгенибиз алгъа таукел атларгъа, адамлагъа джангы таблыкъла къураргъа джарарыгъына ишек этмейме», – дегенди Къарачай-Черкесияны Башчысы.