Эресейчи делегацияны къурамында Къарачай-Черкесияны Башчысы Темрезланы Рашид Сухуми шахарда бардырылгъан «Абхазия — инвестиции в будущее» деген экономика форумгъа къошулгъанды.
Бизни къралдан ол ишге къошулгъан къуллукъчулагъа РФ-ны Президентини Администрациясыны тамадасыны биринчи орунбасары Сергей Кириенко башчылыкъ этгенди.
Абхазияны Президенти Бадра Гунба къонакъларына джылы тюбегенди. Ол бу тюбешиу Абхазиягъа ёсюм алдырыргъа джол ачханын чертгенди.
«Багъалы нёгерлерим! Мен сизни инвесторла неда иш нёгерлеча болмай, биз ашхы умутла этгенибизни сезиб, алагъа джетерге болушхан шохлача багъалатама.
Келигиз, тюз бизнес проектле къурагъандан сора да, бир-бирибизни сыйлай билген, келир заманнга джууаблылыкъны ангылагъан, ышаннгылы иш нёгерле болайыкъ. Сизни сынамыгъыз, ашхы оюмларыгъыз Абхазияны ёсюм алыр хыйсабын тыйыншлы хайырландырыб, аны джетишимли къралланы тизимине къошаргъа себеблик этеригине ышанама.
Абхазиядан хапарлы болгъан бла къалмай, аны халын кёзюгюз бла кёрюрге, келир заманын игилендириуге къошулургъа чакъырама.
Къралларыбызны арасында иш джюрютюу эки джанына да ёсюм алдырлыгъы хакъды.
Бу форум арада иш джюрютюуню тамалын бегитирге джарарыгъына ышанама. Хош келигиз Абхазиягъа! Ишигиз аллына барсын!» – дегенди Бадра Гунба.
РФ-ны Президентини Администрациясыны тамадасыны биринчи орунбасары Сергей Кириенко да: «Иш джюрютгенибизни себебинден транспорт эмда туризм инфраструктура джараша баргъанын, эл мюлк, сатыу-алыу, энергетика дагъыда башха санагъатла ёсюм алгъанларын кёребиз. Эресей бла Абхазия не джаны бла да байламлылыкъ джюрютедиле. Ол байламлылыкъны бегитиб, мындан ары да файдалы проектлени толтурууну магъанасы уллуду», – деб, Эресейни Президенти Владимир Путинни форумчулагъа джазгъанын окъугъанды.
«Абхазия — инвестиции в будущее» деген экономика форумгъа, файдалы иш джюрютюр муратда, власть органланы къуллукъчулары, бизнесменле, экспертле, инвесторла къошулгъандыла.
Ала, ашхы оюмларын айтыб, инвесторланы кёллендирирге джараулу проектлеринден бир-бирин хапарлы этиб, джангы иш нёгерле къураргъа кюрешгендиле. Алайда правительствола арасы 3, ведомствола арасы 1 кесамат этилгенди, 19 меморандум джарашдырылгъанды. Уллу предприятиеле да арада иш джюрютюрге 19 кесамат этгендиле.
Абхазияда болгъаныны юсюнден КъЧР-ни Башчысы Темезланы Рашид МАХ мессенджерде кесини каналында: «Бюгюнлюкде Абхазия акъырын-акъырын ёсюмню джолу бла барады. Аз-аз экономикасын бегите, инфраструктурасын джарашдыра, ол инвесторлагъа таблыкъла къурайды. Бусагъатда анда толтурула тургъан проектле аны тамблагъы ёсюмюню тамалы болуб, адамланы джашауларын игилендирирге джарарыкъларына ийнанама», – деб джазгъанды.
Башчы Къарачай-Черкесия бла Абхазия бурундан да келишиулю джашагъанларын да чертгенди.
«Бизни тарихибиз, маданиятыбыз, эки джанына да хайырлы иш джюрютюрге излегенибиз бирикдиреди. Быллай форумлагъа къошулгъаныбыз ашхы сынам бла алмашыргъа, иш джюрютюуню кенгертирге джарайды», – дегенди Темрез улу.
Республиканы Башчысы форумну кёзюуюнде этилген кесаматла толтурулуб, Эресейге, Абхазиягъа, регионлагъа да ёсюм алдырыргъа джарарына ышаннганын билдиргенди.
«Абхазия – инвестиции в будущее» деген экономика форумну кёзюуюнде КъЧР-ни Башчысы Темрезланы Рашид Абхазияны премьер-министри Владимир Делба бла бирге арада иш джюрютюуню хакъындан меморандумгъа къол салгъанды.
Меморандумда Къарачай-Черкесия бла Абхазия ашхы сынамларын алмашдырыргъа, иш джюрютюуню хакъындан бирге-бирге конференцияла, семинарла бардырыргъа деб джазылгъанды.
Анда джаш тёлю проектлени толтуруугъа, маданият байламлылыкъны бегитиуге айырыб уллу магъана берилгенди.
Анга къол салгъан заманда Темрез улу: «Маданият байлыгъыбызны сакълай, байындыра, келир тёлюлеге бере барсакъ, джаш адамларыбыз арада байламлылыкъны узакъ болджаллы этериклерине ийнанама», – дегенди.
Республиканы Башчысы Темрезланы Рашид меморандум Абхазия бла Къарачай-Черкесияны араларында файдалы иш джюрютюуню тамалын салырына ишек этмегенин да чертгенди.
