Алтотур (март) айны 10-да Къарачай-Черкесияны Башчысы Темрезланы Рашид РФ-ны Федерал Джыйылыууну Федерация Советини Председатели Валентина Матвиенко бла тюбешгенди.

Тюбешиуде бизни республикагъа социал-экономика ёсюм алдырыуну юсюнден сёлешиннгенди. Темрезланы Рашид Валентина Ивановнагъа Къарачай-Черкесия-
да толтурула тургъан проектлени юслеринден толу хапар айтханды. Аны инвесторланы кючлери бла толтуруллукъладан да хапарлы этгенди. Аланы арасында эм уллу проектлени бири да – бизни республикада аэропорт ишлеу. Ол проект тыйыншлысыча толтурулса, регион иги ёсюм аллыкъды деген ышанмакълыкъ уллуду.
Аны юсюнден КъЧР-ни Башчысы Темрезаны Рашид: «Бир джылгъа 2,5 мелиуан чакълы бир туристге къонакъбайлыкъ этебиз. Бизни регионда солургъа излегенлени саны джыл сайын эм азында 15 процентге ёсюб барады. Аэропорт ишлеб башласа уа, Къарачай-Черкесиягъа андан да кёб адам келиб солуругъу хакъды», – дегенди.
Валентина Матвиенко да туристле Къарачай-Черкесияда зауукълу солургъа сюйгенлерин чертгенди. Федерация Советни Председатели къонакъ юйлени, къонакъбайлыкъ этер хыйсабларына кёре, къауумлагъа юлеширге кереклисин айтханды.
«Аллай бир туристге къонакъбайлыкъ этген регионугъуз сынау халда толтурулгъан проектге къошулургъа излегени игиди. Ол ашхы сынамды. Къонакълагъа солур джер теджегенле бары да ачыкъ болургъа керекдиле. Аладан республиканы бюджетине да сом-шай тюшгенлей турлукъду», – дегенди ол.
Тюбешиуде «Защитники Отечества» деген фондну регионал бёлюмю, социал эмда медицина къуллукъла бла бирге аскер къаугъагъа къошулгъанлагъа, аланы юйдегилерине болушлукъ этиуню юсюнден да сёлешиннгенди. Сёз СВО-ну ветеранларына, джараларын бакъдырыргъа келген аскерчилеге джораланнган реабилитация корпус бла экзопротезирование аралыкъ ачылгъаныны юсюнден да баргъанды. Болушлукъ этген заманда хар аскерчини кесине джараулу мадарланы хайырландырыргъа кереклиси чертилгенди ушакъда.