Бюгюнлюкде терроризм, эм уллу палахланы бири болуб, миллет эмда халкъла арасы рахатлыкъгъа къатылгъанлай турады. XX-чы ёмюрню ахырында, XXI-чи ёмюрню ал сюреминде халкъла арасы терроризм салгъан къыйынлыкъла Эресей Федерациягъа къоркъуусузлукъну иги бегитирге керек болгъанын эсгертгендиле.
Аны ючюн къралны башчылыгъы терроризмге къаршчы кюрешни бардырыргъа джараулу бир низамда хайырландырыллыкъ мадарла къуратханды.
РФ-ны Президентини 2006-чы джыл байрым (февраль) айны 15-де чыкъгъан «О мерах по противодействию терроризму» деген 116-чы Указы бла «О противодействии терроризму» деген 35-чи номерли федерал закон бизни къралда терроризмге къаршчы кюреш бардырыуну джангы тамалын салгъандыла.
Бютеу дуниягъа къатылгъан аманлыкъны къурутур джанындан кюреширик органланы ишлерин бирикдирирге да терроризмге къаршчы кюрешни хакъындан миллет комитет къуралгъанды. Аны къурамында министерствола, ведомствола эмда 19 кърал структура рахатлыкъны сакълар мадарланы бирге этиб башлагъандыла.
Комитетни баш джумушлары – терроризмге къаршчы кюреш бла бирге аны профилактикасын бардырыу, болгъан терроризм ишледен джетген зарауатлыкъны тюзетиу. Бу ишле бары да бирча магъаналыдыла. Аланы джетишимли баджарыр ючюн, бютеу органла да келишиулю ишлейдиле.
Тыйыншлы оноула этилиб, къоркъуусузлукъну бегитиучю, джорукъну сакълаучу органла да къадалыб кюрешгенлери бла, талай аманлыкъчы къауум къурутулгъанды, джууабха тартылгъанды, профилактика ишле да тири бардырыладыла. Ала бары да бирге терактладан адамлагъа заран джетмезча этерге кюрешедиле.
Алай этилгенини себебинден, АТЭС, G-8 дегенча къралланы башчыларыны саммитлери, форумлары, XXVII-чи Джайгъы Универсиада, XXII-чи Къышхы Олимпия оюнла, ШОС бла БРИКС аны кибик башха уллу джыйылыула тынчлыкълы ётгендиле.
Алай болса да, бусагъатда болумгъа кёре, терроризмге къаршчы хайырландырыллыкъ мадарланы энтда игилендирирге керекди. Бютеу органла биригиб, къралгъа, джамагъатха къатылыр иннет бла къуралгъан бандит къауумланы да, алагъа болушханланы да къурутургъа керекдиле. Аманлыкъчыла кеслерине къошаргъа излеген адамланы аладан сакъларгъа, къаугъала бардырыла тургъан джерледен Эресейге келирге излеген аманлыкъчыланы чекден ётдюрмезге керекди. Терроризм бла миллетчиликни идеологиясын бардыргъанлагъа къаршчы кюрешге СМИ-ле да тири къошулсала себеб боллукъду.
Бу ишлеге эс бёлюнюб, терроризмге къаршчы кюреш бизни регионда да тири бардырылады. 2006-чы джыл Эресейни регионларында АТК-ла къуралгъанлары да ол политиканы тыйыншлы бардырыргъа иги джараб турады.
Алайды да, Къарачай-Черкесияны Башчысы Темрезланы Рашидни башчылыгъы бла республиканы АТК-сы 2006-чы джыл къуралгъанлы бери 120 кенгеш бардыргъанды. Ол кенгешледе джамагъатны, социал магъаналы объектлени, кёбчюлюк джыйылыучу джерлени, отлукъ-энергетика комплексни, транспорт инфраструктураны дагъыда башхаланы терроризм къоркъууладан сакълар, экстремизм бла терроризмни идеологияларын джайдырмаз мадарла айтылгъандыла. Джаш адамланы арасында ол джаны бла профилактика ишле бардырыугъа да уллу магъана берилгенди. АТК-ны кенгешлеринде белгиленнген ишле баджарыла, айтылгъан оюмла, мадарла хайырландырыла, джуртубузда рахатлыкъ сакъланады.
Алай бла, 20 джылны ичинде Терроризмге къаршчы кюрешни хакъындан миллет комитет не джаны бла да кючлю аралыкъ болгъанды. Ол джамагъатха къоркъуусуз джашау этерча болум къураб турады.
Къарачай-Черкесияны Терроризмге къаршчы кюрешни хакъындан комиссияны аппараты.
