Хар эркиши тиширыудан
Туугъанбыз – хакъды.
Аш орнуна бауурундан
Тойгъанбыз – хакъды.

Джюрегини джылыуундан
Кюч табыб аны,
Ауазындан, тылпыуундан
Дерс алыб аны.

Ёсе келиб, кенг джашаугъа
Чыгъабыз – хакъды.
Ата джуртха джарар джашла
Болабыз – хакъды.

Бир-бирледе, бу болумну
Биз эсден ийиб,
Хыны сёз бла тиширыуну
Джанына тийиб,

Нюр бетине мылы мухур
Салабыз – хакъды.
Ол а бизни мыдах, мугур
Этмезге сакъды.

Мыдах кёрсе, джылы сёзю
Джанынга джарар,
Аурусанг а, джуммай кёзюн,
Къатынгы сакълар...

II
Не ишни да къолгъа алса,
Биширмей къоймаз.
Эркишини бир джерде да
Чырт бетин джоймаз.

Эркишиге тюбесе ол
Артыкъ сёлешмез.
Ашыкъса да, къоймайын джол,
Аллы бла ётмез.

Алдауукъ кука сёзлеге
Джокъду ёчлюгю:
Деменгилиди юсюнде
Намысны кючю!

III
Бир-бирде уа нек къыйнайбыз
Сора аланы?
Нек билмейбиз къыйынларын
Тиширыуланы?

Келе болур бир къауумну
Кёлюне былай:
Чирикликди тиширыуну
Джюрютген алай...

Огъай, тейри! Бош келеди
Эсигизге ол:
Таулу къызгъа бюгюнлюкде
Кенгди хар бир джол!

Къарачыгъыз, къаллай билим
Алгъалла къызла:
Барды дохтур, барды алим,
Минг-минг устазла...

IV
Къарангылыкъ тюлдю аны
Алай джюрютген.
Намысыды тиширыуну
Адебли этген.

Адамлыкъ а? Эй, адамлыкъ!
Кюн бла тенгсе сен.
Тиширыуча, адамлыкъны
Кимди джюрютген?!

Тиширыула анадыла –
Чырт унутмайыкъ!
Ала бизни сыйлагъанча,
Биз да – сыйлайыкъ!

ДИБИРЛАНЫ Шамиль.