Школну эшигинден биринчи атламларын этиб, билимге эшиклени ачхан адам, аны тауусуб кетсе да, ол огъай эсенг, онла бла джылла ётселе да, алайын, туугъан тыбырыча, татлы, багъалы кёреди. Артыкъсыз да бек, сабийни эсинде, кесини баласынача, джан аурутуб, эс бёлюб окъутхан устазыны тюрсюню ёмюрлюкге сакъланыб къалады. Сюйген устазыны бетинде ызларына дери унутмайды ол. Бизни аталарыбыз, аналарыбыз сюргюнню джылларында Орта Азия бла Къазахстанны джеринде къазах, къыргъыз школлада окъутхан устазларыны атларын бюгюн да унутмай, хапар айтадыла.
Алайды да, Огъары Теберди элни школунда орус тил бла адабиятдан устазны – Байчораланы Айшатны, Кечерукъланы Абдулну къызыны – къолунда мингле бла къызла эмда джашла окъуб билим алгъандыла. Бюгюнлюкде аланы бир къаууму кърал къуллукълада, тышында кърал ведомстволада, медицинада урунадыла, кими да, сюйген устазларыны джолун тутуб, школда билим береди, кими да илму бла кюрешеди.
Айшат Огъары Тебердиге джангы келин болуб келген кюнюнден башлаб, бу школда 40 джылдан аслам заманны бет джарыкълы болуб ишлейди. Къуру дерсин бериб, борчуму толтурдум деб, юйюне ашыгъыб кетиучю устазладан тюлдю ол. Сохталаны къайсы бирине да, кесини сабийинеча, керти джан аурутуб, хакъ кёлю бла алай кюрешеди. Айшат школда ишлеген джылларыны ичинде кёб джангы затны да къоша, сынамын да ёсдюргенлей баргъанды.
Сабийлигинде ауур юйдегиде иш бла чыныгъыб ёсгени себебли, ишден артха къачмагъан, арымагъан-талмагъан шартлары бюгюнлюкде да юсюнде сакъланнганлай турадыла. Былайда джигер устазны джаш джылларында джигерлигини юсюнден да чертерге излей эдим. Къумуш орта школну тауусханындан сора, 1976-чы джыл, Айшат Ессентуки шахарны кийим тикген уллу фабрикасыны элде филиалына ишге кириб, бир джылны анда уруннган эди. Ол джыллада джаш къызчыкъ болуб, планны артыгъы бла бериб, бютеу Ставрополь крайда алчы болгъаны ючюн, «Социалист эришиуледе хорлагъан» белги бла саугъаланнганды. Къарачай шахарда устазла хазырлагъан институтха кириб окъуй тургъанлай, кесини туугъан школунда вожатый болуб, къарачай тил бла адабият, тарих, орус тил эмда адабият дерслени да бериб тургъанды. Джаш устазны керти тирилиги, болуму танылгъандан танылыб, махтаулу болгъанлай баргъанды. Анга шагъатлыкъ крайда окъуу бёлюмню, крайкомну атларындан келген махтау къагъытла этедиле, ала бюгюн да сакъланыбдыла. Педагогика институтда баш билим алгъандан сора, Айшат Абдуловна кеси сюйюб сайлагъан санагъатда сабийлени ариу халиге юретирге, билим берирге къаст этиб, джашауун устазлыкъгъа атайды. Алай бла, аны джазыуу Огъары Тебердиге келтиргенди.
Айшат Абдуловна бу школда, орус тил бла адабиятдан устаз болуб, 1984-чю джылдан бери ишлейди. Устазлыкъ этгенден сора да, башында сагъыннганымча, хар сабийни джарсыуун сансыз этиб къоймайды. Ана джюреги аны хар заманда да бирча къайгъыргъанлай турады. Элчиле Айшатны сыйын кёргенлей, бюсюреу этгенлей, разылыкъларын билдиргенлей турадыла бюгюн да. Биргесине ишлегенлеге да Айшат, тамам туугъан эгечлерича, джюрек джылыуун къызгъанмайды, алагъа керек заманда къолундан келгенича кёлтюргючлюк этгенлей джашайды. Ол джашаууну асламысын юйюнден эсе школда ашырады.
Намысына бек, кеси башына сый, махтау излемеген тюз иннетли бу таулу ананы кёб ашхы шартыны юсюнден айтыргъа боллукъду. Аны бла да къалмай, кеси да миллетини, Джуртуну тамам патриотуду десек тюздю. Школда сохталагъа кесини дерслеринден сора да патриот сезимлени, Ата джуртха сюймекликни сингдиргенлей турады. Миллетини сыйын мийик тутуу аны эм баш шартларыны бириди. Баш иеси Байчораланы Шакъманны джашы Абдулмудалиф бла (ауушханды, джандетли болсун), юч джашны ёсдюргендиле. Аланы да иш бла чыныкъдырыб, миллетин, Джуртун сюерге юретгенди, патриот сезимлени ана сютю бла сингдиргенди десек да тюздю. Алайды да, гитче джашы Ислам 2024-чю джылны къыркъаууз (сентябрь) айындан бери СВО-да Ата джурту салгъан борчну махтаулу толтуруб кюрешеди. Анда бизни уланларыбыз къаллай къыйын хыйсаблада уруш этгенлерин барыбыз да ангылайбыз. Ислам, аскер джумушну мийик дараджада бардыргъаны ючюн, Суворовну, «За боевые заслуги» медалла бла саугъаланнганды. Быллай керти патриот джашланы ёсдюрген аналаны, къуру джаз бла бирге келиучю байрам бла алгъышлаб къоймай, хар кюнде да джюреклерин къууандыргъанлай турургъа керек болурбуз, деб келеди кёлюбюзге.
Биз да, Айшат Абдуловнагъа саулукъ, уллу джетишимле, юйдеги насыб теджейбиз. Къысха заманны ичинде джашы Ислам да хорлам бла юйюне келиб, джюрек тынчлыкъда, рахатлыкъда, туудукъларыны да къууанчларын кёрюрлей, узакъ ёмюр берсин Аллах.
БАТЧАЛАНЫ Фатима.
