Гитче Зеленчук элде джашагъан 34 джыл болгъан тиширыу, Эресейни МВД-ны Хабез районда бёлюмюне барыб, кесин аманлыкъчылагъа алдатханын билдиргенди.

Тиширыу айтхандан, аны телефонуна ол танымагъан биреулен къонгурау къагъыб: «Телефон номер бла хайырланнганыны юсюнден кесаматны болджалын созаргъа керекди. Аны ючюн телефонунга келген кодну айтыргъа керексе», – дегенди. Тиширыу аманлыкъчы айтханны этгенди. Артда аны телефонуна тюрлю-тюрлю кодла келиб, ол танымагъан номерледен къонгураула къагъылыб тебрегендиле. Билдириулени биринде тиширыуну «Госуслуги» порталда энчи кабинетинде къагъытларына къаралгъаныны юсюнден айтылгъанды. Андан сора ол «Госуслуги» порталда паролюн ауушдургъанды, кредит джарышдырыргъа да тыйгъыч салгъанды. Алай этиб, кесин аманлыкъчыладан къутхаргъанды.
Къарачай-Черкесияны сыйлы джамагъаты! Аманлыкъчыла телефон номер бла байламлы кесаматны болджалын созаргъа керекди дегенни айтыб, эресейчилени алдагъанлай турадыла. Бир къауумла, алагъа ийнаныб, СМС бла келген кодну айтыб, джарсыугъа тюшедиле. Сакъ болугъуз, аманлыкъчылагъа кесигизни алдатмагъыз!

КъЧР-ни МВД-ны пресс-къуллугъу.