2026-чы джыл байрым (февраль) айны 1-ден Росреестр орнундан тебмеген рысхыны (недвижимость) кадастр эсебге алгъан заманда керекли къагъытланы джарашдырыуну джангы джорукъларын хайырландырыб башлагъанды.
Алай бла, энди джерлени карта-планларына, техника эмда ырджы (межевой) планларына объектни федерал информацион адрес системада (ФИАС) неда Кърал адрес реестрде (ГАР) белгиленнген адресин, ФИАСID-ни амалсыз къошаргъа керекди.
ФИАСID – ол кърал системада хар адресге энчи берилген цифра идентификаторду.
Алгъаракълада кадастр инженерле техника, ырджы планланы хазырлагъан заманларында объектни толу адресин кеслери къол бла джазаргъа керек эдиле. Анда халат джиберилсе, бир хариф терс джазылса да, эсебге алыу да, аны бла байламлы башха ишле да тохтатыла эдиле.
Быйыл байрым айдан башлаб, халатла джиберилмез ючюн, закон бир кесек тюрлендирилгенди. Энди къагъытлада адрес джазылгъан узун текстни орнуна аны цифра коду салынныкъды. Ол код Кърал адрес реестрде хар юйге, джерге, мекямгъа да салынныкъды.
«ФИАС-да болгъан информацияны, аланы идентификаторларын амалсыз хайырландырыу орнундан тебмеген рысхыны эсебге алгъан кёзюуде адам къолдан джиберилирге боллукъ халатла болмазча мадар береди. Юйню неда джерни официал адреси бар эсе, кадастр инженер аны идентификаторун къагъытлагъа къошуб къоярыкъды», – деб хапар айтханды Росреестрни КъЧР-де управлениесини тамадасы Батчаланы Аминат.
Аны бла бирге, къагъытлада объектни адреси, идентификатор халда белгиленмесе да, кадастр эсеб бардырыугъа тыйгъыч боллукъ тюлдю. Ол къауумгъа «Дачная амнистия», «Гаражная амнистия» программалагъа къошулгъанла да киредиле. Былайда адрес объектге белгиленнген джорукъгъа кёре берилмеген неда ол адресация объектге саналмагъан кёзюулени юслеринден айтылады. Аллай болумлада орнундан тебмеген рысхыны къайда орналгъаны къагъытлада джазылады.
Объектни официал адреси болмаса, эм алгъа аны иеси джергили власть органда адресни алыргъа керекди. Адрес берилгенден сора, кадастр инженер аны ФИАСID-син техника неда ырджы планнга къошады. Ызы бла, объектни кадастр эсебге тюшюрюр ючюн, къагъытла Росреестрге джибериледиле.
Орнундан тебмеген рысхыгъызны адреси болгъаны бла къалгъанына ФИАС-ны https://fias.nalog.ru/ сайтында къараргъа боллукъсуз.
