Бу кюнледе Ётгюрлюкню ордени бла юч кере саугъаланнган СВО-ну ветераны Рустам Магомедов Черкесск шахарны 11-чи номерли орта школуну сохталары бла тюбешгенди.
Ол тюбешиу, Ата джуртну къоруулаучуну кюнюне аталыб, «Знание» деген джамагъат бирлешликни бизни республикада бёлюмюню башламчылыгъы бла къуралгъанды.
Рустам Магомедов Шимал Кавказ кърал академияны Эресейни Джигити Боташланы Къанаматны атын джюрютген аскер окъуу аралыгъыны тамадасыды. Ол ВВС бла ПВО-ну 4-чю гвардиячы аскерини излеу-къутхарыу эмда парашют-десант къуллугъуна башчылыкъ этеди.
«Бюгюн биз тюрлю-тюрлю джыллада Ата джуртубузну къоруулагъанлагъа сый беребиз. Мен фронтха кетген кёзюуюмде саугъалагъа сагъыш этмегенме. Сизни тенгли сабийле къазауатны къыйынлыгъын кёрмесинле деген сагъышла къозгъагъандыла ангымы. Ата джуртну къоруулау джюрекледе туугъан джерге, ана тилге, юйдегиге сюймекликден башланады. Эсде тутугъуз: къатындагъылагъа джууаблы болургъа хазыр туруу – ол джигитликди», – дегенди Рустам Магомедов, джыйылгъанланы алларында сёлеше.
Тюбешиуге КъЧР-ни Джамагъат палатасыны председатели, 11-чи номерли школну директору Елена Ляшова, «Знание» деген джамагъат бирлешликни бизни республикада бёлюмюню директору Болатланы Артур да къошулгъан эдиле. Ала да сабийлеге Ата джуртну къоруулауну, туугъан джерге сюймекликни, патриотизмни магъанасыны юсюнден айтхандыла.
«Юлгюле келтирмегенлей керти гражданланы ёсдюраллыкъ тюлбюз. Быллай тюбешиуле сабийлеге джигитлик уруш тюзледе ётгюрлюкден сора да, кюн сайын этилген иш, туугъан джуртха сюймеклик, антха кертилик болгъанын кёргюзедиле. Школубузгъа быллай
джигит джаш келиб, сабийлени алларында сёлешгени уллу сыйды бизге», – дегенди Елена Ляшова.
Тюбешиуню ахырында анга къошулгъанланы хар бирине «Знание» деген джамагъат бирлешлик аскер къаугъаны джигитлерини юслеринден хазырлагъан новеллала саугъагъа берилгендиле. Ол проект маданият башламчылыкъланы президент фондуну болушлугъу бла толтурулгъанды.
«Знание.Герои» деген новелланы 200 мингден аслам экземпляры къралны школларына ашырылгъандыла. Аланы, https://geroisvo.znanierussia.ru/ сайтха кириб, ким да окъургъа боллукъду.
Салпагъарланы Умар.
