РФ-ны Правительствосуну Председатели Михаил Мишустин Кърал Думаны джыйылыуунда озгъан джыл баджарылгъан ишлени юслеринден доклад этгенди.

Ол айтхандан, 2025-чи джыл РФ-ны Президенти Владимир Путинни башламчылыгъы бла 19 миллет проект толтурулгъанды. Аланы кючлери бла къоркъуусуз эмда деменгили джолла, заманны излемине келишген школла, больницала ишленнгендиле, промышленность, илму, бизнес ёсюм алгъандыла.
«Тышындан онгубузну алыргъа излеселе да, Эресей ёсюмню джолу бла барады. Арт 3 джылны ичинде ВВП 10 процентге аслам болгъанды. Орта тергеу бла дуния дараджада да ёсюм аллай бирди», – дегенди Михаил Мишустин.
Бу хапарны Къарачай-Черкесияны Башчысы Темрезланы Рашид МАХ мессенджерде кесини каналында джазгъанды.
Ол чертгенден, Михаил Мишустинни башчылыгъы бла Эресейни Правительствосу, регионла бла къысха байламлылыкъ джюрюте, РФ-ны Президенти Владимир Путин белгилеген миллет нюзюрлеге джетерге болушады. Правительство регионал башламчылыкъланы джашаугъа киргизирге болушлукъ этиб тургъаны бла бизни республиканы эллери, шахарлары ёсюм ала, джашау турмуш табыракъ къурала барады.
Кърал теджеген мадарла тыйыншлы хайырландырылгъанлары бла Къарачай-Черкесияда социал-экономика болум игиди: экономика айныйды, юйле ишленедиле, джангы инвестицион проектле толтуруладыла…
2025-чи джылны эсеблерине кёре, регионланы арасында Къарачай-Черкесия эм кёб туристге къонакъбайлыкъ этгени бла Эресейни алчысы болгъанды.
«Михаил Мишустин къралны политикасы юйдегиге не джаны бла да джакълыкъ этиуге аталгъанын чертгенди. Ол керти да алайды. Аскерчилеге, аланы адамларына болушлукъ этгенибиз бла бирге сабийли юйдегилеге да айырыб эс бёлебиз. 2025-чи джыл да алагъа кёлтюргючлюкге талай къошакъ мадар хайырландырылыб башланнганды. Аны себебинден, сабий туугъан алгъындан асламды.
Эресейни Президенти Владимир Путиннге, къралны Правительствосуну Председатели Михаил Мишустиннге, федерал аралыкъдан бизни регионну социал-экономикасын ёсдюрюрге болушлукъ этген башха кърал къуллукъчулагъа да разылыгъымы билдиреме. Заманны излеми бла байламлы бизге джангы борчла салына, адамланы джангы джарсыулары бола келеди да, аланы барына да къараргъа, джараргъа кюреширикбиз», – деб да къошханды Темрезланы Рашид.