Арт кёзюуде почталаны къарыусуз ишлегенлери амалтын газет окъуучуланы джарсыгъанларыны юсюнден айтылыр ючюн къалмайды. Бютюн да бек, газетлеге джазылыу башланса кёб джердешибизден: «Сюйюб да джаздырлыкъ эдик, алай а почтальонубуз джокъду, кесим барыб почтадан алыргъа да таблыкъ тюшюб турмайды», – деген сёзлени эшитгенлей турабыз.

Алай болса да, республиканы почталарында атларын махтау бла айтдыргъан къуллукъчулары, Аллахха шукур, бардыла. Аланы ичлеринде окъуучула разылыкъларын билдириб тургъан Сары-Тюзню, Юбилейный посёлокну, Черкесскени биринчи бёлюмюню, Преградная стансени почталарында ишлегенлени айырыб айтыргъа тыйыншлыды.
Газетни бу номеринде окъуучуларыбызны тилеклери бла айырма почтальонланы бири бла танышдырыргъа излейбиз.
Бугаёва Ольга Викторовна 1969-чу джыл Черкесск шахарда урунууну сюйген юйдегиде туугъанды. Орта школну бошагъандан сора, бухгалтер усталыкъ алыб, ишге джарашады. Алай а, 1991-чи джыл, СССР чачылгъан кёзюуде, кёб мюлк джабылады. Ольга ишлеген да аланы бири болуб, ол ишсиз къалады. 2005-чи джыл амалсыз джумушу болуб кетген почтальонну орнуна Черкесскеде 12-чи номерли почта бёлюмге болджаллы ишге чакъырадыла. Алайдан, аны ишлегенин джаратыб, 1-чи номерли почта бёлюмге болджалсыз ишге кёчюредиле. Алай бла, ишни да джаратыб, джёнгерлерине да илешиб, усталыгъына кёре иш да излемей, почта санагъатда къалыб кетеди.
– Аллында ишсизлик джунчутхандан кирген эдим почтагъа. Бюгюнлюкде уа, джашаууму ансыз кёзюме кёргюзалмайма. Мени участогумда адамла бир да бир огъурлу, сюйюмлю, келбетли адамладыла. Газетлерин, пенсияларын, сабий ачхаларын, посылкаларын келтирсем, къурман-къор болуб, юйге чакъыргъанлай, саулукъ-эсенлик теджегенлей турадыла. Биринчи ишлеб башлагъан джылларымда гитче балачыкъла бюгюн, онглу адамла болуб, аллыма чыкъсала, тынчлыкъ-эсенлик соруб, кеслерини хапарларын да айтханлай турадыла, – дейди Ольга Викторовна. – Мени участогума эки уллу орам – Комарова бла Заречная – эмда гитче орамчыкъла – Геологов, Дачная, Победы, Строителей, 50 лет Октября – киредиле. Иш нёгерлерим да хатерли, ишлерине берилген, адамны сыйын кёрген адамладыла. Керек кюнде болушургъа, бир-бирибизни джумушларыбызны тындырыргъа артха турмайбыз.
Комарова орамда джашагъан окъуучуларыбыз, бир-бири ауузларындан алыб, Ольга ишин деменгили тындыргъаныны юсюнден хапар айтдыла. Ол газетни чыкъгъан кюнюнде огъуна келтиргенин, пенсияланы, башха почта бла табдырылгъан затланы да, къар болсун, боран болсун, заманында къолларына джетдиргенин чертедиле.
– Кеси да, асыры дженгил джюрюгенинден, ызындан джетелмей къалабыз, – деб ышарады Къумукъланы Фатима, разылыгъын билдире.
Ольга 1-чи класслы почтальонду. Адамладан бюсюреу табыб, кёб джылланы тутхан ишин джетишимли, деменгили  тындырыб тургъаны ючюн, «Почта России» ФГУП-ну Къарачай-Черкесияда филиалыны управлениеси аны Хурмет грамотала эмда ачха ёчле бла саугъалагъанлай турады. Аны тышында,  ол Къарачай-Черкес Республиканы Халкъ Джыйылыууну (Парламентини) Президиуумуну  Хурмет грамотасына да тыйыншлы болгъанды.
Ольгача почтальонларыбыз кёб болсала, окъуучуларыбыз ол къадар газетлерин, кърал берген ачхаларын, посылкаларын рахат, заманында алыб, зауукъланырла деб ышанырчады. Кючлю саулукъ, насыб, узакъ ёмюр теджейбиз джигер тиширыугъа.

Тебуланы Салимат.