Черкесск шахарда джашайды. Саулукъ сакълауда ишлейди. Баш иеси джашлай ауушханлыкъгъа (Аллах джандетли этсин), эки аламат джашны ёсдюрюб, баш билим алдырыб, юйлендирген да этиб, туудукъчукъларына огъур ання болуб джашайды. Эки джашы да бирер джерде атларын сый бла айтдырыб къуллукъ этедиле.

Зухра ана тилни, миллетини тин байлыгъын багъалатхан атаны-ананы къолларында ёсгенди. Сабийлерине да ол шартланы сингдиргенди. Зухрагъа бир тюрлю бир учунуу келиб, назмула джазыб тебрегенди.
Къаламынг джити болсун дей, газет окъуучуланы аны редакциягъа ийген талай назмусу бла танышдырыргъа излейбиз.

Джангкъозла

Къыш чиллени аллы бла
«Джангкъозларым» чакъдыла,
Джаз аланы сакъламайын
Толгъан эдиле муратла.

Къарны акълыгъы кёрюнмеди
Джашил хансдан джайлыкъда.
Гоккаланы кёре эдим
Бузлаб тургъан акъ къарда.

Къолум бузлай, мен узалдым
Джангкъозланы джыяргъа.
Бирчигин да табалмадым –
Насыб кетди узая.

Къар да эриди, джай да келди,
Джангурла да джаудула.
Мутхуз болгъан кечелени
Джарытдыла джулдузла.

Назму тизгин, джыр макъамла
Ыз къоя джюрегимде,
Къучакъ толу кёк джангкъозла
Кёлюмю кёлтюрдюле.

Шоркъачыкъла бир суу болуб,
Саркъадыла тенгизге.
Къайгъыладан джюрек толуб,
Мутхуздула сезимле.

Толгъан айдан джарыкъ урса,
Къууаналла джюрекле.
Джашлыкъны насыбы тутса,
Джаз чагъарла балийле.

Джарыкъ кюнле эсимделле,
Киргенчалла тюшюме.
Джаралы болгъан джюрегим
Джылайд, бугъуб теренде.

Минги Тау

Алан халкъым, тау миллетим,
Минги Туну сыйлайбыз!
Шам Къарачай, ёхтем Малкъар
Бу джерледе джашайбыз.

Кавказымы джер джюзюнде
Табигъаты сейирлик.
Джашайд халкъым тау этекде,
Тилейд миллетге бирлик.

Чалбаш таула сюелелле,
Кёл бере миллетиме.
Мингиден суула энелле,
Джырлагъа эжиу эте.

Минги Таугъа атаб, халкъым
Джазад назмула, джырла,
Унутмагъанд тау намысын,
Сингдиред джашха, къызгъа.

Кёк чууакъды, ай джарыкъды,
Кюн джылтырайд эртденде.
Иннет кирсиз, джюрек ачыкъды
Саулай алан миллетде.

Унутмайыкъ биз кимлебиз:
Скиф, сармат эм аланла!
Къаллай келбетли джердебиз!
Бизден насыблы къайда?

Джигит Къарачай

Тау миллетим, къарачайым,
Джашаед тынч уруна.
Ачы хапар келди элиме:
«Къобугъуз къазауатха»!

Ата джуртну къорууларгъа
Ашыкъдыла аланла.
Джигитлеча алгъа бара,
Джаугъа къаджау турдула…

Миллетиме – алан халкъгъа –
Къуугъун келди эртденде.
Мал вагонла толгъандыла
Къартладан, сабийледен.

Шоркъалагъа эжиу эте,
Келмез тауладан таууш.
Тау миллетим барад кетиб,
Басханд аны ауур сагъыш.

Атам, дерге – ата джокъду –
Атала къазауатда,
Къарнаш, дерге – къарнаш джокъду –
Джан берелле урушда!

Ёхтем, джигит Къарачай!
Атмай юсюнден сыйын,
Къайтыб келди, тансыкълай,
Ол джерин, сууун, ташын.

Джаша, джашна, шам Къарачай!
Ата джуртунга келдинг!
Унутулмаз, Аллах айтса,
Сени терен тарихинг!