Байрым (февраль) айны 6-дан 8-не дери, Москва шахарда ММА тутушну СБИ – RF MMA тюрлюсюнден Эресейни биринчилиги ючюн спорт эришиуле ётгендиле. Анга, хазна къалмай, Эресейни бютеу регионларындан да спортчула къошулгъандыла. Ала, бу спортну лагъымлары бла уста хайырлана, кючлерин сынадыла, бу спортну талай тюрлюсюнде эришдиле.

Биринчи оруннга чыгъар ючюн кёбле кюрешдиле. Алай болса да, «ММА Сэйф» деген дисциплинада техника джаны бла да, башха лагъымлары бла да уста хайырланыб, бизни джердешибиз Батчаланы Мухаммад, кишиге ал бермей, биринчи оруннга чыгъыб, алтын медалгъа тыйыншлы болгъанды. Кёб турмай Турцияны, Анталия шахарында, Дунияны биринчилиги ючюн спорт эришиуле бардырыллыкъдыла. Бу хорлам Батча улугъа ары барыргъа джол ачханды.
Батча улу Мухаммад Алийланы Умарны атын джюрютген Къарачай-Черкес кърал университетни физкультура факультетини студентиди. Кеси да студентлени «Барс» деген спорт клубуну къурамындады. Джаш адам болса да, спорт бла кюреширге, окъууун да джарсытмагъанлай бардырыргъа заман табады.
Бу тукъум уллу джетишимине бек къууаннганыбызны билдире, биз барыбыз да Мухаммадны алгъышлайбыз. Энди аллында уллу сынауну да тыйыншлы ётерлей анга хорлам теджейбиз. Дуния дараджада бардырыллыкъ эришиуледе да биринчи болуб, туугъан джуртуну, окъугъан университетини да атларын дуниягъа айтдырлыкъды деб, ышанабыз.

(БИЗНИ КОРР.).