Аты таулагъа, тюзлеге белгили, джигитлиги, джигерлиги кёб къралгъа бёлюннген, халкъ бюсюреу этген онглу адамланы бириди Байчораланы Ибрагимни джашы Пилял. Ол, мийик джетишимлерин къатлай, таулу халкъына халал къуллукъ эте джашайды.
Самбодан, дзюдодан «СССР-ни спортуну устасы», дагъыда самбодан «Спортну халкъла арасы класслы устасы» деген сыйлы атланы джюрютеди.
Пилял 1971-чи джыл башил (январь) айны 5-де Джёгетей Аягъы шахарда Ибрагимни халкъыны адебин, намысын, ашхы адетлерин багъалатхан юйдегисинде туугъанды. Орта билим берген школну бошагъандан сора, баш билим алыр муратда Къарачай-Черкес кърал университетге тюшюб, аны физкультура бла спорт факультетин джетишимли тауусханды. Спорт бла 1981-чи джыл Джангы Джёгетейде кюрешиб башлагъанды. Аны Эресейни махтаулу юретиучюсю Чомаланы Юрий юретгенди. Байчора улу, 1989-чу джыл аскерге барыб, Армияны спорт клубунда къуллукъ этгенди. Анда чыныгъыб, спортдан да кёб джангы затха юрениб, юйюне къайтады. 1992-чи джыл Адыгея Республикагъа контракт бла баргъанды. Анда спорт бла кючлю кюреше, уллу эришиуледе, турнирледе хорлаб, алчы орунланы алгъанды.
Ол, къайда болса да, спортну къоймай, аны тюрлю-тюрлюсю бла кюрешгенлей, сынам, билим, алгъанлай, къыйын болса да, тёзюмлюлюню, джигерликни кючюн къатлай, магъаналы спорт эришиулеге къошулуб, биринчи орунланы алыб, таукел алгъа баргъанды. Пилял, учунмакълыгъына тири джюрюш бериб, талай мийик джетишимге ие болгъанды.
Анга 1990-чы джыл самбодан «СССР-ни спортуну устасы» деген сыйлы ат аталады. Ол 1991-чи джыл дзюдодан «СССР-ни спортуну устасы» деген атха ие болады. Анга 1995-чи джыл самбодан «Спортну халкъла арасы дараджалы устасы» деген сыйлы ат аталады.
Пилял 2002-чи джыл кеси тренер болуб, джаш адамланы джигерликге, джигитликге, тириликге юретиб башлайды. Джууаблы, къыйын ишин сый бла толтура, аны дараджасын кёлтюреди. Пилял бусагъатда Къарачай-Черкес Республикада самбодан баш юретиучюдю. Ол юретген спортчула мийик дараджада бардырылгъан халкъла арасы эришиуледе, турнирледе хорлаб, биринчи, ёчлю орунланы аладыла.
Байчора улу 1996-чы джыл самбодан Эресейни чемпионатында хорлагъанды. Ол джыл самбодан Японияда бардырылгъан Дунияны чемпионатында 2-чи орунну алады. 1997-чи джыл дзюдодан Хорва-
тияда бардырылгъан Дунияны биринчилигинде хорлаб, алтын медалгъа ие болады.
1995-чи джыл Тула шахарда самбодан Эресейни Кубогун алады. Джигер спортчу, усталыгъыны юсю бла джетишимлерин къатлай, 1995-чи, 1996-чы джыллада самбодан къралла арасы турнирледе хорлаб, биринчи орунланы алгъанды. Самбодан Эресейни Сауутлу кючлерини 1994-чю, 1995-чи, 1996-чы, 1997-чи, 1998-чи джыллада бардырылгъан чемпионатында да биринчи орунлагъа чыкъгъанды. 2021-чи джыл Эресейни дзюдодан уста ветеранларыны арасында бардырылгъан чемпионатында хорлагъанды. Байчора улу, дагъыда кёб спорт эришиулеге къошулуб, алада биринчи, ёчлю орунланы алгъанды.
Пилял Къарачай-Черкес Республиканы самбодан баш юретиучюсюдю. Аны джетишимлерин кърал кёб саугъа бла белгилегенди. Талай медалы, Хурмет грамотасы, диплому, Бюсюреу къагъыты барды. Анга, физкультура бла спортха къошхан юлюшю ючюн, «Общественное признание» деген орден берилгенди.
Пилял, джаш адамланы спортха юрете, аланы чыныкъдыра, саулукъларын бегите, къарыуун, кючюн, сынамын аямай кюрешеди. Халкъыбызны келлик тёлюсю тыйыншлы адамла болуб ёсерлерине энчи юлюш къошады. Халкъланы арасында шохлукъну, бирикмекликни, рахатлыкъны, Джуртха кертиликни кючюн бегите джашайды.
Узеирланы Хусей.
