Байрым (февраль) айны 9-да РФ-ны Правительствосуну Председателини орунбасары Дмитрий Патрушев суу къобханнга, от тюшгеннге къаршчы кюреш бардырыу бла байламлы ишлени юсюнден федерал структураланы тамадалары эмда регионланы башчылары бла кенгеш бардыргъанды.
Кенгешге видеоконференция халда КъЧР-ни Башчысы Темрезланы Рашид да къошулгъанды.
Кенгешде 2025-чи джыл суу къобханнга, от тюшгеннге къаршчы кюреш бла байламлы этилген ишлени эсеблери чыгъарылгъандыла, быйыл этиллик ишле белгиленнгендиле.
Росгидромет билдиргеннге кёре, къралны кёбюсюнде мардадан эсе кёб джауум (осадки) джаугъанды. Аны амалтын, хауа болум терк-терк тюрленсе, суула бек къобаргъа боллукъларыны юсюнден айтханды Дмитрий Патрушев. Аны ючюн, ол ишге бюгюн огъуна терен эс бёлюб, суу джагъаланы бегитирге, суу ызланы ариуларгъа кереклисин чертгенди ол.
Суу къобаргъа, от тюшерге боллукъ кёзюуге хазырланыу бла байламлы Къарачай-Черкесияда да кёб тюрлю иш бардырылады. 2026-чы джыл алтотур (март) айда республикада къоркъуулу болумлагъа джууаблы къуллукъну (РСЧС) органларыны хазырлыкъларына къараллыкъды.
2026-чы джыл суу къобуб, къоркъуулу болумла къуралмазча, эки магъаналы иш баджарыллыкъды – Къарачай шахар округну джеринде Къобан эмда Мара сууланы, Ючкекенде Эшкакон сууну джагъаларын бегитген бедженлеге тамамлы ремонт этилликди.
Аны бла бирге быйыл Зеленчук стансе бла Хуса-Къарданик элде Хуса-Къарданик суу, Къарданик стансе бла Къызыл Октябрь элде Къарданик суу, Морх элде Морх суу тазаланныкъдыла.
Кенгешде федерал ведомствола, регионал власть органла, башха къуллукъла къоркъуулу болумлагъа къаршчы кюрешде биригиб ишлерге керек болгъанлары чертилгенди.
Андан сора да шахарланы, эллени табигъатны услулугъу амалтын от тюшгенден сакълауну, къыйын джерледе от джукълатыуну, от тюшерге боллугъун билдириуню юсюнден сёлешиннгенди кенгешде.
Профилактика ишлени файдалыкъларын ёсдюрюуде, къоркъуулу болумлагъа терк эс бёлюуде тюрлю-тюрлю органланы биригиб ишлегенлерини уллу магъанасы болгъаны да чертилгенди. Дмитрий Патрушев айтхандан, озгъан джыл ала бир-бирлери бла къысха байламлылыкъда ишлегенлерини себебинден уллу табигъат палахладан чарпыусуз къутулур амалла табылгъандыла.
Республикада от джукълатыучу къуллукъ толу хазырлыкъда турады. Чегетге от тюшгени болса, болумгъа кёре, къуллукъну кючю ёсдюрюллюкдю.
