Байрым (февраль) айны 10-да РФ-ны экономика ёсюмюню хакъындан министрини орунбасары Сергей Назаровну башчылыгъы бла хайырландырылгъан электрокъууатны багъасын тёлеуню юсюнден кенгеш бардырылгъанды. Анда бу иш бла байламлы озгъан джылны эсеблери сюзюлгендиле.

Кенгешге видеоконференция халда КъЧР-ни Правительствосуну къуллукъчулары, регионда электрокъууатны хайырландырыугъа джууаблы ведомстволаны тамадалары къошулгъандыла.
Къарачай-Черкесияны Правительствосуну Председателини орунбасары Орусланы Марат бизни республикада ол иш 2025-чи джыл къалай баджарылгъаныны юсюнден доклад этгенди.
Сергей Назаров да 2022-чи джылдан бери Къарачай-Черкесияда коммунал джумушла ючюн хакъ тёлеу тири джюрюш алгъанын, регионал власть тыйыншлысыча ишлегенини себебинден бусагъатда кёргюзюмле бир да иги болгъанларын чертгенди.
Кенгешни ахырында коммунал джумушлагъа тёлеулени толусу бла джабар, бусагъатдагъы кёргюзюмлени андан да ары ёсдюрюр ючюн этиллик ишлени планы белгиленнгенди. Республиканы отлукъ-энергетика комплексине ёсюм алдырыугъа аталгъан ишлеге эс бёлюннгенлей турлугъу да айтылгъанды.