Эресейни МВД-ны Джёгетей Аягъы районда бёлюмюне Джёгетей Аягъы шахарда джашагъан 50 джыл болгъан бир эркиши микрокредит организациягъа борчун бермейди деб, билдириу келгенди.

Тинтиу ишлени кёзюуюнде эркиши кредит алмагъаны, кесаматха къол салмагъаны белгиленнгенди. Полицияны къуллукъчулары ачыкълагъаннга кёре, шахарда джашагъан, джукъда ишлемеген 32 джыл болгъан биреулен, башында айтылгъан эркишиге ишге кирирге болушама деб, алдаб, банк картасыны данныйлерин билиб, кесини телефон номерине кёчюргенди. Ызы бла аны атына микрокредит организациядан ёнгкюч (займ) алгъанды, ачханы кесини счётуна ашырыб, сюйгенича джойгъанды.
Аманлыкъчыны тутуб, полиция бёлюмге элтгендиле. Ол терслигин бойнуна алгъанды. Анга РФ-ны УПК-сыны 144-чю, 145-чи статьяларына кёре терслеу иш ачылгъанды.
Багъалы джамагъат, КъЧР-ни МВД-сы бу затланы эсгертеди: аз таныгъан неда танымагъан адамларыгъызгъа ийнанмагъыз, смартфонугъузну, банк карталарыгъызны биреуге бериучю болмагъыз, финанс джаны бла билимигизни ёсдюрюгюз.

КъЧР-ни МВД-ны пресс-къуллугъу.