Мындан алда «Архыз» курортну Къыбыла джанында «Романтик» деген турист посёлокда, иш этиб къуралгъан сноупарк ачылгъанды. Ол джангы объект, къышхы инфраструктураны бир кесеги болуб, лыжала бла уста учуучулагъа, сноубордистлеге джораланыб этилгенди. Уста учуучула алайда эркин солурча, заманларын зауукълу ашырырча мадарла къуралгъандыла.

Курортну къонакъларындан ски-пассы болгъан хар адам да ары хакъсыз барыргъа боллукъду. Ол алайда, усталыгъын кёргюзюрге, фахмусун, билимин, джигерлигин танытыргъа эркинди. Бу ашхы джер учууну техникасын иги билгенлени кесине чакъырады.
Сноупарк иш этиб тюрлю-тюрлю дараджада къуралгъан къыйын джерлери бла, чынгагъан заманда адамны узакъгъа учурургъа джораланнган затлары (трамплинлери) бла джиппинг-зоналары эмда фанбокслары бла таб джарашдырылгъанды. Былайда болгъан зат да тау лыжа комплексни къоркъуусузлугъуну излемини тамалында къуралгъанды.
Ол зонагъа кирген джерде, анда адам кесин къалай тутаргъа, джюрютюрге керклисин эсгертген, юретген информациялары болгъан стендле салыннгандыла. Ары барыргъа излеген кесини къарыуун, хазырлыгъын билиб, кесин сакъларгъа джараулу кийимлени, башха затланы хайырландырыб, къоркъуусузлукъну излемин сакъларгъа борчлуду. Райдер хар учхан кёзюуюнде кесини къоркъуусузлугъуна кеси джууаблыды. Курортну алайгъа къарагъан къуллукъчулары уа, джорукъ къалай сакъланнганын контролда тутадыла.
«Архыз» курортну тау лыжа инфраструктурасыны ёсюмюню дараджасы мийикди. Аны къурамына 27 километр узунлугъу болгъан 4 тюрлю тау лыжа джол бла 8 чынды джол киредиле.
Сноупарк кюн сайын сагъат 9-дан ингир ала 4-ге дери ишлейди. Кечеги сессия болгъан сагъатда, къошакъ заман берилиб, ингирде сагъат 6-дан кече 9-гъа дери да учаргъа боллукъду.

Узеирланы Хусей.