Эресейни Социал фондуну Коми Республикада бёлюмю озгъан джылны эндреуюк (декабрь) айында онлайн халда шахматладан эришиуле бардыргъан эди. Аны кёзюуюнде къралны 23 регионундан Социал фондну Къартлагъа джораланнган аралыкъларына джюрюгенлени арасында эм кючлю шахматчыла эришген эдиле.

Эришиулеге бизни джердешибиз Ючкекен элден 70 джыл болгъан Джатдоланы Казбек да къошулгъан эди. Ол саулай Эресей дараджада бардырылгъан эришиуледе хорламлы болгъанды.
Оюн швейцар система бла 11 тургъа юлешиннгенди, хар партиягъа 5-шер минут берилгенди. Хорламгъа эм кёб очко алгъанла тыйыншлы болгъандыла. Чыгъарылгъан эсеблеге кёре, Джатдоланы Казбек, эришиулени барын да джетишимли тамамлаб, алтын медалгъа ие болгъанды.
«Алгъын заманлада, къарт, джаш да орамлада джыйылыб, шахмат ойнай эдиле. Бусагъатда да шахматлагъа эс бёлгенле аз тюлдюле. Мен талай кере республиканы чемпиону болгъанма. Алай а алгъаракълада классика системаны хайырландыра эдиле – кюннге бир партияны ойнай эдик. Бу онлайн эришиуледе уа 11 тур болгъанды. Тюзюн айтыргъа, хорламлы боллукъма деб турмай эдим», – дегенди Джатдоланы Казбек.

(БИЗНИ КОРР.).