Бу кюнледе республикабызны, халкъыбызны белгили адамларыны бири, РФ-ны Спорт министерствосуну «За заслуги в развитии физической культуры и спорта» деген хурмет белгисин джюрютген, КъЧР-ни физкультурасыны махтаулу къуллукъчусу, «Нарт» футбол клубну тамадасы Къоркъмазланы Джагъафарны джашы Алибек ауушханды деб бушуу хапар келди.

Алибек, саубитген адам, гитчелигинден огъуна спорт бла кюрешиб башлагъан эди. Эресей, халкъла арасы, башха мийик дараджалы эришиулеге къошулуб, алчы орунланы алыб тургъанды.
Махтаулу ишлери ючюн республикан эмда кърал дараджада бюсюреу табхан хурметли джердешибиз джаш тёлюню спортха кёллендириуге, ариу халиге юретиуге кёб къыйын салгъанды.
Иги кесек заманны Къарачай-Черкесияда футбол клуб болмагъанына къайгъырыб, талай джылны мындан алда КъЧР-ни Башчысы Темрезланы Рашид «Нарт» профессионал футбол клубну айнытыргъа, аны профессионал футбол лигагъа къошаргъа борч салгъан эди. Къоркъмаз улу, бу ишни къолгъа алыб, клубну аякъ юсюне салгъан эди. Аны башчылыгъы бла клуб джангыдан къуралыб, тюрлю-тюрлю дараджалы эришиулеге къошулуб, атын махтау бла айтдырыб башлагъан эди. Бюгюнлюкде да «Нарт» джетишимлери бла къууандыргъанлай турады. Къоркъмазланы Алибек Къарачай-Черкесияда футболну джангы дараджагъа чыгъарыр ючюн къарыуун-кючюн аямай кюрешгенди.
Алибекни таныгъанла, билгенле аны халаллыгъын, таукеллигин, кёб адамгъа джарагъанын чертедиле. «Къарачай» газетге да болушур ючюн къалмагъанды.
Аныча ашхы, огъурлу адамла арабыздан кетгенлери саулай халкъыбызгъа уллу къоранчды. Къоркъмазланы Алибек дуниясын ауушдургъанына терен бушуу эте, юйдегисине, джууугъуна-тенгине къайгъы сёз беребиз. Аллахны рахматында, Файгъамбарны (гъ.с.) шапагъатында болсун.

«Къарачай – алан халкъ» джамагъат бирлешлик,

Къоркъмазлары тукъум,

«Къарачай» газетни коллективи.