Бу кюнледе Пятигорск шахарда РФ-ны Президентини Шимал Кавказ федерал округда Толу эркинликли келечисини аппаратыны кёлтюргючлюгю бла «День ВЭБ.РФ и институтов развития» эмда «Возможности для защитников Отечества» деген джыйылыула бардырылгъандыла. Алагъа КъЧР-ни Правительствосуну Председателини орунбасары Джанибек Суюновну башчылыгъы бла Къарачай-Черкесияны делегациясы да къошулгъанды.
Форумгъа РФ-ны къоруулау министрини орунбасары, «Защитники Отечества» деген кърал фондну председатели Анна Цивилева, РФ-ны Президентини ШКФО-да Толу эркинликли келечисини орунбасары Владимир Надыкто, Ставрополь крайны губернатору Владимир Владимиров, федерал эмда регионал власть органланы, инвестицион институтланы къуллукъчулары, табышлылыкъ иш бла кюрешгенле, СВО-ну ветеранлары, «ВЭБ.РФ» кърал корпорацияны, «Защитники Отечества» фондну, «Сколково» аралыкъны, Промышленностну ёсюмюню федерал фондуну келечилери къошулгъандыла.
Къарачай-Черкесиядан баргъан делегацияны къурамына киргенлени арасында КъЧР-ни Урунуу бла социал ёсюмюню, Экономика ёсюмюню, Физкультура бла спорт министерстволарыны къуллукъчулары, «Защитники Отечества» фондну регионал бёлюмюню, «Мой бизнес» аралыкъны келечилери, КъЧР-де СВО-ну ветеранларыны ассоциациясыны, КъЧР-де Ата джуртну къоруулаучуланы юйдегилерини комитетини тамадалары бар эдиле.
Эки кюнню ичинде ала Шимал Кавказны экономика кючюню, СВО-гъа къошулгъанланы табышлылыкъ бла байламлы проектлерин джакълауну юслеринден ачыкъ ушакълагъа къошулгъандыла. Биринчи кюн бизнесге федерал эмда регионал дараджада къаллай болушлукъ этилгени сюзюлгенди. Экинчи кюн а бизнес бла кюреширге кёлленнген аскерчиле бла аланы юйдегилерине болушлукъ этиуге аталгъанды.
«День ВЭБ.РФ и институтов развития» джыйылыуну тамалында «Спорт для всех» деген эришиуле да бардырылгъандыла. Шимал Кавказны регионларыны СВО-ну ветеранларындан къуралгъан командалары армрестлингде, пауэрлифтингде, олтуруб ойналгъан волейболда къарыуларын сынагъандыла.
Эришиулени эсеблерине кёре, Къарачай-Черкесияны келечилери джетишимли болгъандыла. Алайды да, Наурузланы Мекер армрестлингде, пауэрлифтингде да алтын медалланы, Байрамукъланы Дахир пауэрлифтингде алтын медалны, Ислам Хатков армрестлингде джез медалны алгъандыла. Олтуруб ойналгъан волейболдан эришиуледе Къарачай-Черкесияны командасы ючюнчю оруннга ие болгъанды.
