Бу кюнледе КъЧР-ни Башчысы Темрезланы Рашид, уллу кенгеш бардырыб, бу джыл «Год единства народов России» бла «Год духовного и культурного наследия народов КЧР» деб баямланнганы бла байламлы этиллик ишлени белгилегенди.
Кенгешге республиканы Правительствосуну къуллукъчулары, Халкъ Джыйылыууну (Парламентини) депутатлары, шахарла бла районланы башчылары, дин эмда джамагъат бирлешликлени тамадалары къошулгъандыла.
Кенгешни ача, Темрез улу РФ-ны Президенти быйылны Эресейни халкъларыны биригиулерини джылы деб баямлагъаныны магъанасы уллу болгъанын чертгенди.
«Джауларыбыз бизни рахатлыгъыбызгъа къатылыргъа излеб, тышындан уу ийиб, джамагъатны арасында къаугъала чыгъарыргъа дыгалас этген кёзюуде Президент баш бошлугъубузну тамалы не заманда да бирикмеклик болгъанын барыбызгъа да эсгертгенди», – дегенди Темрезланы Рашид.
Аны юсюнден Башчы МАХ мессенджерде кесини аккаунтунда да Ата джурт къазауатны кёзюуюнде да, бусагъатда СВО-да да тюрлю-тюрлю миллетлени, динлени келечилери, къралыбызны политикасын джакълар ючюн, бир-бирлерине билек болуб, миллетчилеге къаршчы кюрешни бирге бардыргъанларын да чертгенди.
Мындан ары да биригиб, «Год духовного и культурного наследия народов Карачаево-Черкесии» деб баямланнган джыл айырыб эс бёлюрге, мийик дараджада баджарыргъа керекли ишлени юслеринден айтханды Башчы.
Темрез улу чертгенден, эм алгъа аскерчилеге, аланы юйдегилерине эмда алагъа къарагъан, джарагъан «Защитники Отечества» фондну регионал бёлюмю бла ветеран бирлешликлеге болушлукъ этиуге аслам эс бёлюнюрге керекди.
Республикада джашагъан халкъланы, конфессияланы энчи шартларын ачыкълау, алагъа ёсюм алдырыу да баш ишлени тизимине киредиле. Ол джаны бла быйыл республикада кёб иш этилликди. Алагъа Эресейни халкъларыны ассамблеясыны регионал бёлюмю бла джамагъат эмда миллет бирлешликле башчылыкъ этерле деген ышанмакълыкъ уллуду. Алагъа аны ючюн, республиканы Башчысы Темрезланы Рашидни башламчылыгъы бла ачха болушлукъ да этилликди. Къарачай-Черкесияда Шокълукъну юйю да, ол джумушланы баджарыргъа джараулу джер болуб, аны ючюн къуралгъанды.
Бу барыбызгъа да магъаналы затланы ёсюб келген тёлюге сабийликден сингдирир муратда, сабий садлада огъуна хар игилик да Ата джуртха, туугъан джеринге, юйюрюнге сюймекликден башланнганын ангылатыу ишле бардырыргъа кереклисин да чертгенди республиканы Башчысы.
Темрезланы Рашид джаш тёлю политиканы юсюнден да айырыб айтханды. Башчы джаш тёлю аралыкълада тюрлю-тюрлю миллетлени келечилерини арасында келишиулюкню ёсдюрюуге, шохлукъну бегитиуге аталгъан ишле асламыракъ бардырылсала излегенин билдиргенди.
Къонакъланы Къарачай-Черкесияны таурухлу табигъаты, джууукъ кёллю джамагъаты, бай тарихи бла шагъырей эте, туризмни айнытыу да баш джумушланы тизимине киргенди.
«Бизни республика хар неси бла да Эресейни кесине тамам ушаш «баласыды». «Бирликде – тирилик» деген айтыу да республикабызгъа, къралыбызгъа да бирча келишеди. Ёмюрледен бери шох джашагъан джамагъат анга шагъатлыкъ этеди. Эресейни кёб миллети нени да хорлагъан кючюдю», – дегенди Темрез улу.
Кенгешде КъЧР-ни Правительствосуну Председателини орунбасары Сюйюнчланы Мурат регионну миллет политикасына аталгъан доклад этгенди.
Ол чертгенден, 2036-чы джылгъа дери РФ-ны халкъларын бирикдириуге аталгъан джангы стратегия алыннганы бла байламлы бизни республикада да миллетле арасы келишиулюкню ёсдюрюуге, ана тиллени сакълаугъа аталгъан кёб иш этилликди.
Аланы арасында ана тиллени сакълауда цифра технологияланы хайырландырыу, КъЧР-ни Муслиманларыны дин управлениеси бла Орус православ клисаны Пятигорск бла Черкесскеге къарагъан епархиясыны арасында иш джюрютюу дегенча ишлеге быйыл да айырыб эс бёлюннюкдю.
Республиканы Вице-премьери Евгений Поляков, КъЧР-ни Халкъ Джыйылыууну (Парламентини) депутаты Алексей Ганшин дагъыда башха джууаблы къуллукъчула рахатлыкъны сакълаугъа, шохлукъну бегитиуге аталгъан ишлени юслеринден кеслерини оюмларын айтдыла.
Кенгешни ахырында Темрезланы Рашид: «2026-чы джыл келишиулюкню, алгъа учунууну джылыды. Президент бизге ол джолну кёргюзгенди. Биз аны джарыкъ эмда файдалы ётдюрюрге кюреширикбиз.
Бизни баш борчубуз Къарачай-Черкес Республика Эресейни айырылмазлыкъ кесеги болгъаны бла къалмай, аны ышаннгылы «билеги» болгъанын кёргюзюудю», – дегенди.
