Байрым (февраль) айны 3-де Къарачай-Черкесияны Башчысы Темрезланы Рашид ёксюз, джакъсыз къалгъан сабийлени джашар джер бла баджарыугъа аталгъан кенгеш бардыргъанды.

Ол кенгешге республиканы прокурору Олег Жариков, РФ-ны Тинтиу комитетини КъЧР-де управлениесини тамадасыны къуллукъ борчларын толтургъан Владимир Хорольский, КъЧР-ни Правительствосуну Председатели Мурат Аргунов, КъЧР-ни Башчысыны эмда Правительствосуну Администрациясыны тамадасы Мурат Озов дагъыда ёксюзлеге джууаблы башха кърал къуллукъчула къошулгъандыла.
Темрезланы Рашид, кенгешни ача, ёксюзлени джашар джер бла баджарыу бир да магъаналы иш болгъаны ючюн, аны тыйыншлысыча этерге республикан бюджетде асламыракъ ачха джораланнганын чертгенди. Башчы айтхандан, 2021-чи джылдан бери бюджетде ёксюзлеге фатарлагъа белгилениучю ачханы ёлчеми 5 кереге ёсгенди. Алай бла, быйыл ол джумушха 308 мелиуан сом чыгъарылгъанды.
Кенгешде ёксюзлеге джууаблы къуллукъчула, аланы джашар джер бла баджарыр ючюн, регионал, муниципал дараджалада баджарылгъан ишлени юслеринден докладла этгендиле.
Алагъа тынгылагъандан сора, республиканы Башчысы Темрезланы Рашид Правительствогъа джангы борч салгъанды: прокуратураны, тинтиу органланы келечилери бла бирге ёксюзлени джашар джер бла баджарыугъа аталгъан «джол картаны» толтуруугъа джууаблы ишчи къауум къураргъа.
«Юйлю-кюнлю болургъа кёзюулерин сакълагъан ёксюзлени санын азайтыу, аланы джашар джер бла тыйыншлысыча баджарыу эмда джамагъатны арасында орунлу этиу бизни борчубузду», – дегенди Темрез улу.